Loneitu ṭhate lawmman sem an ni

Support to State Extesion Programme for Extension Reforms Scheme, ATMA Mizoram hnuaia State Level Best Farmer Award 2019-2020 chu nimin khan Agriculture minister C Lalrinsanga'n a pisaah a sem. Award hian thuchei leh Rs. 1,00,000 a keng a ni.

Agriculture Minister chuan, Best Farmer Award-in a tum ber chu, loneitu mimal tiṭhate chawimawina aiin, ei leh bara ramin intodelhna kawng zawh theihna tura intihsiakna ṭha buatsaih a nih thu a sawi a, "Ei leh bara Mizoram a intodelh loh vanga ṭhenawm ram leh state dangte thar chhuah lak luh nan thla tin sum a luang chhuak nasa. Ram economy chawikâng turin ei leh bara intodelhna a, thar chhuah tihpun a pawimawh tak zet," a ti.

Intodelh pawimawhna sawiin C Lalrinsanga chuan, "State dangah thla tin sing hnih khat hlawh tura ṭhalai rualte intirh chhuah aiin a lêt tam taka hlawk zawk ei leh bara ram intodelhna tur ni bawk si Mizoram chhungah hian Agriculture leh a zawmpui péng eizawnnaah ṭhalaite tan hna thawh tur a tam a ni," a ti a; Mizoram sum lak luh tipung tur leh ei leh bara intodelhna turin theihtawp chhuaha hma an lak thu a sawi.

State Level Best Farmer Award hian - Agriculture, Horti­culture, AH&Vety, Fisheries, Sericulture-a eizawngtute a huam. Award dawng tur thlan­naah ATMA chuan tehfung siam sa hmangin kut hnathawktute chu hna an thawhna hmunah an endik a ni.

Award dawngtute

FC Vahnei, Chakhei (Siaha dist.)

Laldanga, Thingsul Tlangnuam (Aizawl dist.)

Biakdawli, Armed Veng (Aizawl dist.)

Vanlalliana, Leisang Veng (Serchhip dist.)

PC Sangawia, Chekàwn (Serchhip dist.)