PWD Minister-in kawng chhe lai enfiah

PWD minister Vanlalhlana leh Assembly deputy speaker Lalfamkima-te chuan February 24, Inrinni khan Khamrang leh Buichali inkar kawng an tlawh a; kawng chhe lai enfiahin, PWD hotute nen siamṭhat dan tur an sawiho.

Khamrang leh Buichali inkar kawng hi km 14.80 a thui a ni a, kawng siam hna hi Ratna Infrastructure Projects Pvt. Ltd. thawh niin, May 7, 2021 khan an thawk zo a, enkawlzui hna hi May 7, 2026 thleng tur a ni.

PWD report-a a inziah danin, hemi kawng hi November 16, 2021 khan NHIDCL hnenah Mizoram PWD chuan a hlan tawh a, nimahsela NHIDCL hian PWD leh Ratna Infrastructure Projects Pvt Ltd. te contract a la tawp lo tiin hemi kawng hi kut an thlak duh lo. He kawng hi contractor hian maintenance chu ti chho ve zel mahse August 25, 2023 aṭang khan an tawpsan a ni.

Contractor-in an tawp san hnu hian kawng a chhe bawk si nen PWD chuan helai kawng chhe zual hi boulder-te hnawhin a ṭhenlai chu concrete pavement siamin a thawk a, boulder pawh cubic metre 2387.05 hman a ni a, concerete pavement pawh metre 213 a thui a siam a ni. He hnathawhna pawh hi fund hmuh a la ni lo a, SASCI aṭanga hmuh tura ruahman niin, sum hi awm tawh mahse release a la nih loh avangin department chuan a la ba a ni.

Tunah hian contractor-ten hna an tawp san avangin an contract chu February 23, 2024 khan tihtawp a ni a, contractor pawisa (performance bank quarantee) cheng nuai 73 chu pek tawh niin, he sum hmang hian hna thawh tum mek a ni.

A kawng chhe zual laite assessment siam a ni a, boulder cubic metre 2,700 vel hnawh ngai tur a chhut a ni. Kawng khuar lai chu JCB hmanga laih a, chumi hnuah chuan boulder hmanga hnawh tum a ni a, heng hna bak hi chu tun dinhmunah chuan pawisa hian a daih dawn rih lo a ni.