Malaria laka invenna tur thosilen vailiam

Health minister Lalrinpuii chuan February 24, Inrinni khan MINECO Open Gym aṭangin Mizoram khaw hrang hranga a thlawna sem tur thosilen damdawia chiah, Long Lasting Insecticidal Nets (LLIN) a vailiam.

LLIN thosilen hi sikserh (malaria) laka kan invenna tur atana Global Fund (Global Fund to Fight AIDS, Tuberculosis and Malaria) sum bultuma National Vector Borne Diseases Control Programme (NVBDCP) kaltlanga hmuh niin, Mizoram tan 4,14,197 pek a ni.

Lalrinpuii chuan, damdawi chiah thosilen sem chuan malaria natna tihtlem kawngah awmze thui tak a neih ngei a beisei thu a sawi a, "Natna chi hrang hrang tireh a, umbo tur chuan mithiamte ruahmanna siamte a hlawhtlin ngei theihna turin inrelbawlna chhawng hrang hranga thawktute’n a nih dan tur ang taka kalpui a, tihtak zetna nen an thawh a pawimawh," a ti.

Mizorama mihring cheng zat chu state lian zawkte nen khaikhin chuan a la tlem hle tih sawiin Minister chuan, "Tih tak takna nen hma kan lak chuan hriselna kawngah hma nasa takin kan sawn thei a ni tih rilru pu chungin theihtawp chhuah ang che u," a ti a; Mizoram mipui tana an thawh tura sorkarin a tuk chu inthlahdah lo leh thawhhona ṭha tak nei chunga ti turin kalkhawmte a sawm.

LLIN thosilen hi March-April, 2024 inkar hian Mizorama district 9-ah mipui hman theih tura sem zawh hman tum a ni a; Mizoram a khaw tinah ni loin, malaria tamna khuaahte NVBDCP-in sem dan tur a tih anga sem a ni ang. Thosilen dawng tur khu te chu Sub-Centre khua kum khat chhunga mi 1,000 zel aṭanga chhuta malaria vei mi pakhat leh a aia tam awmna (API more than 1) khuaahte sema ni dawn a ni.

Sorkar thuchhuah tarlan danin, thosilen hi chhungkaw member zat mil zela sem a ni dawn a, thosilen hi damdawia chiah sa a nih angin a damdawi ṭhat hun chhung (expiry) hi kum thum a ni. Thosilen hi a dawngtu mipuiten a hmanna tur dik takah an hmang ngei tur a ni a, tihral emaw lui lam sa man nan hman phal a ni lo.

Mizoram hi malaria chenchilh ram a la ni a, tun dinhmunah India rama mi 1,000 zel aṭanga malaria vei hmuhchhuah zat aṭanga chhutin India rama malaria tamna ber state a ni mek a; January-December, 2023 chhung khan Mizorama malaria rinhlelh thisen exam 3,34,100 zinga mi 17,988 chu malaria vei an ni a, nunna chan mi 13 an awm.

Tih tur leh tih loh turte

1. In leh ramriahnaah LLIN thosilen hnuaiah ngei zan tin mut tur.

2. Thosilen hi hman hmain darkar 24 dahchhuah hmasak tur.

3. Thosilen hi mar taka zarin, awngphah hnuaiah bilhluh thlap tur a ni.

4. LLIN thosilen hi tuilum, sahbawn leh surf-te nen suk loh tur, tui hlangin zawitea nuaia suk tur.

5. Suk zawhah nisa ah ni lo in, daihlim hnuaiah zar ṭhin tur a ni.

6. LLIN thosilen hi suk laiin nuai leh sawp vak vak loh tur.

7. Sangha leh lui lam sa reng reng man nan hman loh tur a ni.

8. LLIN thosilen hi hralh chhawn emaw, pawhpen phal a ni lo.

9. LLIN thosilen hi kum 3 leh vawi 20 suk daih tura duan a ni.

10. LLIN thosilen hi lei leh hralh khap tlat a ni.

11. Kum 3 chhungin engtik hunah pawh endik theih turin kawl ṭhat tur a ni.