Adviser to CM-in photo exhibition hawng

Adviser to CM TBC Lalvenchhunga, MLA chuan February 24, Inrinni khan Chawlhmun Community-ah Ministry of Information & Broadcasting, Govt of India, hnuaia Central Bureau of Communication, Aizawl Office buatsaih 'Integrated Communication & Outreach programme and Photo Exhibition on 9 Years of Seva, Sushasan & Garib Kalyan programme' a hawng.

TBC Lalvenchhunga chuan, central sorkar hnathawhte leh schemes hrang hrang puanzarna hun ṭha tak buatsaih a ni chu lawmawm a tih thu a sawi a, "Mizoram tan central schemes hrang hrangte chu hai rual lohin an pawimawh. A mamawh tak takten sorkar hmalakna an dawn theih nan puanzar deuh deuh a ṭul," a ti.

Chief Minister-in sorkar hna thawh hrang hrang convergence a ngaipawimawh tih sawiin Lalvenchhunga chuan, "Mizoram mipui tan a ṭhat zawk nan central leh Mizoram hmalaknate a theih anga converge a ṭul a, mipuiten central sorkar scheme-te zau zawka an hriat theih nan tun aia chak zawka Central Bureau of Communication, Aizawl Office an kal ka duh," a ti a, Aizawl pawnahte inzar pharh turin a chah.

He hunah hian HBC associate professor Dr H Lalzuithangi'n central sorkar flagship schemes hrang hrang a sawifiah a; photo exhibition hi February 26, 2024 thleng awh tur a ni.