Sports infrastructure awm sate infiammite'n a nih dan tur angin hmang ṭangkai se - Sports Minister

Sports & Youth Services minister Lalnghinglova Hmar chuan February 24, Inrinni khan Kawnpui khuaa SYS department hnuaia Kawnpui Playground No. 2-a phullem phah mek leh hockey ground-te a enfiah. Sports Minister chuan, sorkarin a duh ber chu sports infrastructure awm sate infiammite'n a nih dan tur angin hmang ṭangkai se tih a nih thu a sawi.

Lalnghinglova Hmar chuan, sorkar tharah zirna leh hriselna lama insen hmasak tum a nih avangin infiamna hmunhma buatsaih vak vak chu insum rih a ṭul dawn thu a sawi a, "Hemi rual hian infiamna hmunhma awm sa leh hmalakna kal mek chu ṭha leh ṭangkai thei ang bera hman tum a ni dawn. Sorkarin a duh ber chu sports infrastructure awm sate infiammite'n a nih dan tur angin hmang ṭangkai se tih a ni," a ti.

A enkawl depart-ment dang - Labour, Employment, Skill Development & Entrepreneurship (LESDE) hnuaiah ṭhalai tam zawkin ei zawnna an neih theihna tur kawng dapin sorkar laipui nen indawrna kalpui a nih tawh thu sawiin Lalnghinglova Hmar chuan, ṭhalaite hmasawnna tur leh ruihhloin a tihbuai ṭhalaite chhanchhuahna kawngah khawtlang hruaitute'n ngaihtuahna senga, theihtawpa sorkar thawhpui turin a sawm.

Minister hi Kawnpui SDO (Civil) Mohammad Aaquib leh Kawnpui khawtlang hruaitute'n an lo dawngsawng a; Kawnpui Playground No. 2-a phullem phah hna hi cheng nuai 600 senna tura ruahman niin, hna 90% vel zawh tawh a ni.