Super IAS, Mission UPSC tiin thlak

Mizoram Youth Commission (MYC) chairman Malsawmzuala Ralte chuan February 23, Zirtawpni tlaiah khan MYC-in a enkawl UPSC exam tura Delhi-a inbuatsaiha awm mek Mizo ṭhalai 10-te Delhi Mizoram House-ah zanriah a eipui a; Super IAS tih ṭhin chu Mission UPSC tia thlak a nih thu a sawi.

Malsawmzuala Ralte chuan, Super IAS tih ṭhin kha Mission UPSC tia thlak a nih thu a sawi a, "UPSC exam tura inbuatsaih mekte hian 'ka thei a ni' tih rilru puin, in tih ve tur lam inbuatsaihnaah theihtawp chhuah ang che u," a ti a; Mizo mipuite'n beiseina sang tak nen an thlir thu a hrilh.

He hunah hian MYC Chairman-in a sawm angin Vision IAS coaching centre-a zirtirtu Satender-a'n prelims exam tura inbuatsaih dan leh hmachhawn dan tur a sawifiah a; Mizo ṭhalai UPSC exam tura inbuatsaih mekte pawhin MYC chairman hnenah hian an harsatna tawh te lo hrilhin, MYC Chairman chuan a theih anga sutkian an tum tur thu a sawi bawk.