KHAWTHLIR

Vice President a lokal dawn

Vawiin hian vice president Jagdeep Dhankar chuan Mizoram a rawn tlawh dawn. Ruahman lawk dan chuan vawiin hian Vice President hian Mizoram University (MZU) convocation ṭum 18-na a hmanpui anga, chumi hnuah Mizoram Legislative Assembly Budget Session neih mek chhimin, thu a sawi ang. Chumi hnuah Raj Bhavan panin, Raj Bhavan aṭang hian Mizoram chhuahsan turin Lengpui Airport a pan dawn. MZU convocation-ah hian chief minister Lalduhoma pawh a tel ang.

Lungphun phun

Siaha district bawrhsap Lalhmunsanga Hnamte chuan tunhnai khan Siaha district chhung Chheihlu khaw rama Tliatlu tlang panna kawng lungphun a phun a; MTP Branch, Chheihlu ten thahnem ngai taka Tliatlu tlang an lo humhalh tlat chu entawntlak a tih thu a sawi a, "Thing leh mau, nungchate tichereu lo zawnga hnathawh a ṭul hle," a ti.

MoS-in Kolasib MJA-te a kawm

Minister of state Lalnghinglova Hmar chuan February 24, Inrinni khan Kolasib Press Club tlawhin, Mizoram Journalists' Association (MJA) Kolasib district member-te nen an inkawm. Lalnghinglova Hmar chuan ṭhalai kaihhnawih department pathum a chanah theihtawpa hmalak a tum thu a sawi a, an hma lakna tur kawng hrang hrangah bengvar a, finchhuah ṭhin turin MJA member-te a sawm. Inkawmhona kaihruaitu Kolasib District MJA president Andrew Vanlalauva chuan MJA chhungkua aṭanga minister ni thei an nei chu lawmawm an tih thu a sawi.

JJM scheme

February 23, Zirtawpnia Assembly session-ah MNF member Lalchhandama Ralte zawhna chhangin PHE minister Prof. Lalnilawma chuan Mizoramah JJM scheme hnuaiah khua 728 cover tawh a nih thu House a hrilh a, "Khaw 621 ah JJM scheme hnuaiah hnathawh zawh tawh a ni. Hnathawh tan loh na khua kan nei tawh lo," a ti.