Vice President-in House-ah thu a sawi : India economy-in hma a sawn chho zel - Jagdeep Dhankhar

Nimin Assembly session-ah vice president Jagdeep Dhankhar chuan thu sawiin, "India economy-in chak takin hma a sawn chho zel," a ti.

Vice President chuan, kum 11 liam taah India ram economy chu khawvelah 11-na a nih thu sawiin, "Tunah chuan pangana a ni tawh. Canada, UK leh France hmaah a awm," a ti a, kum hnih thum a liam leh hnuah chuan India ram chu Japan leh Germany-te ai pawha economy lian zawk a nih tawh dawn thu a sawi.

Act East Policy chu thil thlak danglamtu a nih thu sawiin Jagdeep Dhankhar chuan, "Kum 10 liam ta chu hmarchhak tana hun duhawm (golden era) a ni," a ti.

Ṭum dang ang lo taka Mizoramah hmeichhe pathum MLA an awm chu lawmawm a tih thu sawiin Vice President chuan, "Hmeichhe pathum Assembly House-a member an ni hi inchhuanna tur a ni," a ti a, hmeichhiate kaihhruaina hnuaiah hmasawnna chak taka pan theih a nih thu a sawi.

Vice President sawi danin, September 20-21, 2023 khan Lok Sabha leh Rajya Sabha chuan Lok Sabha leh state legislature-a hmun thuma ṭhena hmun khat hmeichhiate tana reservation siamna tur 'Nari Shakti Vandana Adhiniyam' a pawm.

Jagdeep Dhankhar chuan PM-DevINE scheme hnuaiah cheng vbc 600 sengin Aizawl bypass road leh bamboo link road siam mek a ni tih sawiin, "PRASHAD Project hnuaia Chite-a Aizawl Convention Center sak leh bamboo link road pahnih siam tur hian Mizoram chu tourism lamah a vawrh dawn," a ti.

Thusawitu dang, chief minister Lalduhoma chuan, India ram state dangte'n hmasawnna kawng hun rei tak an zawh hnuah Mizoram chu a piang ve chauh tih sawiin, "Kum 1986 hmalamah chuan Mizoram hi a buai ṭhin hle. Chuvangin, hmasawnna kawngah midang kan um a ngai," a ti a, theihtawp chhuahin midang um phak tum a nih thu a sawi.

Chief Minister chuan Vice President chu hun rei zawk cham tura Mizoram rawn tlawh leh tur leh, Delhi-ah Mizoram tana theihtawp chhuahsak turin a sawm.

Assembly speaker Lalbiak­zama chuan inlawmna thu sawiin, Vice President-in thu a sawi zawh hnuah House member-te nen Assembly Annexe tualah thla an la ho.

Vice President hian Assembly House aṭangin Raj Bhavan a pan a, hun eng emaw chen a chawlh hahdam hnuah Mizoram chhuahsan turin Lengpui Airport a pan leh nghal a ni.