House-in amendment bill a pawm

Nimin Assembly session-ah Taxation minister Dr Vanlalthlana awm loh avanga a aiawha minister K Sapdanga put luh, 'The Mizoram GST (Amendment) Bill, 2024' chu lungrual taka pawm a ni.

He bill hi casino, horse racing leh online money gaming aṭanga GST lak a nih theih nana GST dan siamṭhatna a ni. Heng thil pathum aṭang hian 28% GST lak a ni. He amendment hi India ram pumpuiah October 1, 2023 aṭanga hman tura GST Council-in thutlukna a siam tawh avangin, Mizoramah chuan ordinance hmanga hman a ni a, tun session-ah hian act-a siam turin bill hi put luh a ni.

The Constitution (One Hundred and First Amendment) Act, 2016 hmang hian India ram pumpuiah GST Act hi July 1, 2017 aṭangin hman ṭan a ni. Central government leh state government-ten dual authority system a kalpui a ni a, central GST Act, 2017 nena hmang kawp turin state tinte'n mahni GST Act ṭheuh an nei.

India ram pumah inang tlanga hman tura siam a nih avangin GST Council remtihna-a central GST Act tihdanglam a nih hian, state hrang hrangten an state GST Act ṭheuhte an tidanglam ve ṭhin.