Vice President-in MZU convocation a hmanpui

Vice president Jagdeep Dhankar chuan nimin khan Mizoram University Multipurpose Hall-ah MZU Convocation vawi 18-na a hmanpui a; Mizoram chhunga mi leh zirlaite chu midangte aia ṭang zawk turin a chah.

Jagdeep Dhankar chuan, zirlaite'n kumtluana an hahpui, rim taka lehkha zira an sual chhuah degree ṭha tak tak an nei thar chu a lawmpui thu a sawi a, "Mizoram chhunga mi leh zirlaite hi midangte aia in ṭan zawk angai. In hmaah tih tur leh hmalak tur tam tak a awm nghal a, Act East India hnuaia hmalakna hrang hrangte a tahtawla tihhlawhtlin mek niin, thawh tur tam tak hengahte hian a awm dawn," a ti a, tourism sector-ah phei chuan thawh tur a tam thu a sawi.

Ṭhalaite chuan India ram hmasawn leh ṭhan nasat lai takin an vanglai an hman thu leh vannei a tih thu sawiin Vice President chuan, "Kum 2047 a lo thlen hun a tana India ramin ram hausa leh ram changkang nih a tumnaah Mizoram ṭhalaite hi a thawh hlawk ber zingah tel tum ang che u," a ti.

Convocation-ah hian Governor Dr Hari Babu Kambhampati, MZU Chief Rector ni bawk te, chief minister Lalduhoma leh Prof. Prakash Bartunia-te chu khualzahawm an ni. Vice President hian degree, gold medal leh prize dawngtu zinga thlanchhuahte hnenah degree leh medal a hlan.

MZU aṭang hian degree nei thar mi 7,980 an awm a, heng zinga 1,104 chu pek nghal niin, convocation-a kal lo mi 6,876 an awm a ni.

Convocation-a mahni ngei kala degree latu zat:

* Doctor of Philosophy - 110

* Master’s Degree - 518

* Master’s Professional - 141

* Bachelor’s Degree with Professional

* Courses - 271

* Gold Medalist - 56

* Book Prize - 7

TOTAL 1,104