Police officer-te'n an kawl theih chin bak lirthei leh mihring an kawl tawh lo - HM

Home minister K Sapdanga chuan, police officer-te'n danin a phal sak chin bak lirthei leh mihring (police) an kawl tawh loh thu nimin Assembly session-ah House a hrilh.

ZPM member VL Zaithanzama zawhna chhangin Home Minister chuan, dan phal chin bak kawl lo turin department chhungah an in ngen thu a sawi a, "February, 2024 chhungin inchingfel ang aw, kan ti. Report kan dawn hnuhnung berah chuan danin a phal sak chin bak lirthei leh mihring kawl an awm tawh lo. Officer pension tawhte zingah pawh lirthei leh mihring kawl an awm tawh lo," a ti.

K Sapdanga chuan BJP member Dr K Beichhua zawhna chhangin, Police department-ah post ruak 4,268 a awm thu a sawi a, "Post ruakte hi hnawh khah tum mek a ni. Vawi leh khatah erawh kan hnawh khat vek thei lo ang, sum dinhmunin a zir lo. A tahtawlin hnawh khah kan tum ang," a ti a, post ruak hnawh khah a nih theihna tur atana buaipui mek leh dil mek a awm thu a sawi.

ZPM member T Lalhlimpuia zawhna Home Minister-in a chhan danin, SASCI aṭangin police housing scheme atan cheng vbc. 50 hmuh a ni dawn a, cheng vbc. 25 hmuh tawh a ni. Cheng vbc. 25 hmangin Aizawl leh a chhehvelah police-te chenna leh pisa thawmṭhat hna thawh mek a ni a, cheng vbc 25 hmuh a nih leh veleh Lunglei leh a chhehvelah hmalak leh a ni ang.

Home Minister chuan MNF member Lalrinsanga Ralte zawhna chhangin, sum dinhmunin a zir chuan ramria police post-te thuam chak tum a nih thu House a hrilh.