Zoramthanga uapna kan la mamawh - Tawnluia

MNF chuan nimin khan an pisa-ah chhung inkhawm an hmang a, thusawitu MNF sr. vice president Tawnluia chuan, an party-in Zoramthanga uapna an la mamawh thu a sawi.

MNF Sr. Vice Presi­dent chuan an official candidate-te chu an party nomination committee-te'n an aiawha an thlan chhuah a nih thu sawiin, "Tun dinhmunah chuan Pu Zoramthanga uapna kan la mamawh. Ramri leh hnam issue-ah a hnathawh ang thawk an awm lo. Kum 15 lai chief minister lo ni tawh hi sulsutuah kan la mamawh a ni," a ti.

Tawnluia chuan, official candidate-a a hming lang lo chung­changah, "Ka duh dan takin min telh tawh lo hi ka lawm a ni. MNF chu Mizo hnam party a nih angin, ruling-ah awm lo mah ila Mizo nationalism champion pui turin kan kal zel ang," a ti a, an goal an hlen chhuah hma chu an kal zel dawn thu a sawi.

MNF chuan hruaitu term a tawp apiangin official nomination an siam ṭhin tih sawiin Tawnluia chuan, "A duh tan floor aṭanga chuh theih a ni. Floor aṭanga chuhtu an awm loh chuan official candidate-te tlingah puan ṭhin an ni. Chuhtu an awm loh chuan candidate chhawp chhuahsate chu tlingah puan an ni ang," a ti

Thusawitu dang, MNF adviser J Malsawmzuala Vanchhawng chuan, ZPM sorkar thla hnih leh ni riat chhunga an hmalakna langsar tak chu chief minister office thuam a nih thu sawiin, " An hmalak dan hi a mak hle," a ti a, portfolio nei lo tura insawi khan tunah chuan CMO a tilianin a tichak hle niin a sawi.