Saitualah CIC hoin RTI zirhona buatsaih

Chief information commi­ssioner (CIC) John Neihlaia hoin nimin khan Saitual DC conference hall-ah RTI Act 2005 leh Mizoram RTI Rules 2010 zirhona buatsaih a ni a; CIC chuan, "Sorkar hnathawkte hi mipui chhiahhlawh angin insawi mah ila, kan rilruah kan in pawm thei tak tak ṭhin lo," a ti.

John Neihlaia chuan, sorkar hnathawkte'n RTI chu hna pawimawh bera an ngaih loh ṭhin avangin a pekchhuah kawngah an khaihlak ṭhin tih a sawi a, "Sorkar hnathawkte hi mipui chhiahhlawh angin insawi mah ila, kan rilruah kan in pawm thei tak tak ṭhin lo a, chuvang chuan mipuite nen kan inkarah langtlang lo tam tak a awm phah ṭhin. Mi ram ngaihtuah chuan Mizorama RTI lut hi a la tlem hle a, a zawttute pawh kan chhanna dawnah kan lungawi hma hle," a ti.

RTI chu hriatchian a ngaih hle thu sawiin John Neihlaia chuan, "RTI section 2 J(1) phei chuan hnathawh a hmuna va endik (inspection of work) thlengin a huam a, sorkar inrelbawlna thuruk ni ṭhin chu RTI hian langtlangin a siam a ni," a ti a, khaw tina VC-te chu an huam chhung ṭheuhah SPIO an nih thu leh RTI tihlawhtling tur chuan mi tinin mawhphurhna an neih thu a sawi.

Mizoram Information Commission secretary H Dolian­buaia chuan he hun hi kaihruaiin, thu a sawi a, "Information Com­mi­ssion hi langtlang inrelbawlna a awm theih nan thuneihna sang tak pek a ni a, RTI hmanga kan mawhphurhnate hi ngenna (request) ni loin, kan tih ngei ngei tur (mandatory) a nih avangin RTI zawhnate hi namnul mai mai chi a ni lo," a ti.

Saitual DC Dr Lalngura Tlau pawhin thu sawiin, sorkar department ṭhenkhatah RTI nihna pawh la hrechiang lo an awm chu pawi a tih thu a sawi a, "RTI chu India danpui, Fundamental Right hial a rìn luh tawh, pawimawh tawpkhawk a ni a, sorkar hnathawkte'n RTI pekchhuah chu keimahni tana thil pawi a nih loh tehreng nen hun ṭhenkhatah an tikhawtlai ṭhin hi hriatthiam a har," a ti a, langtlang inrelbawlna nei tura ṭan la turin kalkhawmte a sawm nghal.

RTI zirhonaah hian MIC deputy secretary Lily-i'n thil pawimawhte a sawifiah bakah, zawhna leh chhanna hun a kaihruai a; Saituala sorkar department hrang hrang DAA, SAPIO leh SPIO-te, Saitual leh a chhehvela khawtlang hruaitute leh tlawmngai pawl hruaitute an tel a ni.