Prime Minister-in rel station a hawnna chhîm

Prime minister Narendra Modi chuan nimin khan India ram hmun hrang hranga rel station 554 leh flyover/under pass 1,500 a hawng a; Mizoramah pawh he hun hi Sairang rel station-ah Lok Sabha MP C Lalrosanga leh PWD minister Vanlalhlana hoin video conference kaltlanga chhîm a ni.

Lok Sabha MP C Lalrosanga chuan, Mizorama rel kawng siamna leh a kaihhnawih hnaahte tualchhung mite a tam thei ang ber chhawr a ṭul thu leh Railways hna atana Mizo ṭhalai trained theih ang angte train a ṭul thu a sawi a, "Hemi atan hian Mizoram sorkar leh Railways thuneitute hma la turin ka ngen duh a ni," a ti.

Relin Sairang a lo luh a, Hmawngbuchhuah thlenga a kal hunah phalna nei lo leh dan lo anga hnam dang rawn lut an awm lohna tura ruahmanna siam turin Mizoram sorkar leh Railways thuneitute ngenin C Lalrosanga chuan, "Khauh taka dan kengkawh turin ka ngen che u, rel kawng leh a bungruate venhim a ṭul," a ti a; Mizorama lut tur rel kawngte tihchhiat leh dan chah phal loh tur a nih thu a sawi.

PWD minister Vanlalhlana chuan, Prime Minister-in railway project hrang hrang 2,000 vel, cheng vbc 41,000 hu a hawnna an chhim thei chu lawmawm a tih thu a sawi a, "Rel lo luh hunah insakna bungrua leh bungraw dangte pawh man tlawm zawkin kan lalut thei tawh dawn," a ti a, khualzinte tan pawh awlsamna nasa tak a thlen dawn thu a sawi.

Mizorama rel lolut tur hian hna tam tak a rawn keng tel dawn tih sawiin PWD Minister chuan, "Hnam dang thawh atan dah loin, a ram mite ngeiin thawh tum a pawimawh. Act East Policy hnuaia ramdang nen insumdawntawnna kawtchhuah kan nih hunah, eizawnna atana hmang thei tura hmalak a ṭul," a ti.

Vanlalhlana chuan mipuite'n kan theihna kan tah hriam loh a, hmathlir leh hmachhawp nei loa kan lo thlir liam ve mai mai chuan remchanna (opportunity) lian tak kan hloh dawn tih sawiin, hmasawnna lo thleng tur chu ram mipuite'n a ṭha zawnga chhawr ngei turin tun aṭanga nasa taka lo inpuahchah a ṭul thu a sawi.

PWD Minister sawi danin, Bairabi-Sairang inkar km 51.38-a thui Broad Gauge Line siamna tur lungphum hi November 29, 2014 khan prime minister Narendra Modi chuan a phum a, December 15, 2015 aṭangin hna thawh ṭan a ni. He BG Line-ah hian rel station pali - Sairang, Mualkhang, Hortoki leh Kawnpuiahte siam mek a ni a, tun dinhmunah he national project hi 92% zawh tawh niin, October 2024 hian thawh zawh hman beisei a ni.

He project bakah hian Sairang - Hmawngbuchhuah inkar rel kawng (km 223) atan July 24, 2023 khan Ministry of Railways chuan final location survey a rawn sanction leh a, he project chungchang hi sorkarin a ngaihtuah mek a ni.