MLA-in Yuva Samvad India a hmanpui

Pachhung University College (PUC) NSS chuan nimin khan an college-ah Yuva Samvad India @2047 an buatsaih a, MLA Jeje Lalpekhlua'n a hmanpui.

Jeje Lalpekhlua chuan, Mizoramin hma a sawn theih nana sorkar hmalakna tur policy hrang hrangte leh hand holding policy chungchang leh, zirlaite tana policy awm thei angte sawiin, "Mizo nun ze mawi - tlawmngaihna, huaisenna, thawhrimna leh aia upate zah thiam a pawimawhin, chhawm nun zel a ṭul," a ti.

Resource person CYMA gen. secreyary Prof. Malsawmliana chuan zirlaite chu theihtawpa ram leh hnam tana ke pen ve tur leh, lehkha an zirna kawngah ram leh hnam hmangaihna rilru pu chunga zirtur te, ram leh hnam ṭhatna turah ngaihtuahna seng ve turin a chah.

Yuva Samvad India hi Ministry of Youth Affairs and Sports, Govt. of India-in state tina NSS hnuaia unit hrang hrangte hmang tura a tih anga hman a ni. Ṭhalaite'n ram leh hnam hmangaihna an neih thar theih nan leh zalenna hlutzia an hriatthiam thar theihna tura buatsaih a ni.