Khawzawl-Rabung kawng siamṭhat dan tur sawiho

Khawzawl bawrhsap K Lalrohlua hoin nimin khan a pisaah Khawzawl-Rabung kawng (km 33) siamṭhat dan tur sawiho a ni a; Khawzawl PWD Division leh Rabung Village Council aiawhte an tel.

Ṭhutkhawmah hian Rabung VC-te chuan, ṭum hnih khat kawng chhe zual lai (pot holes, etc) hnawh zeuh zeuh a awm tih loh chu kum 30 vel helai kawng hi enkawl mumal loh a nih thu an sawi a; PWD lam chuan a theihna ang angin a siamna tur sum an zawn thu te, NABARD-ah pawh project siama an thehluh thu leh a tlang loh thute an sawi.

Khawzawl PWD Division-te hian Tualpui-Rabung kawng (km 16.25) siamṭhat nan North Eastern Council (NEC) hnuaia North East Special Infrastructure Schemes (NESIDS) aṭangin cheng vbc 78 ruahman a nih thu an sawi a; Rabung VC-te hian Khawzawl - Rabung - Tualpui siamna tur sum ruahman a awm mek chungin, a kawngpui ber (main road) zawk Khawzawl - Rabung - Khualen hi siam ni se an duh thu an sawi bawk.

Bawrhsap K Lalrohlua chuan, NABARD lam hotute a lo sawipui tur thu leh PWD chu project siamṭha tura inruahman turin a chah a; he kawng hi siamṭha turin a theihna apiangah hmalak a tum thu a sawi.