Sorkar tharah dan loa rawn lut kuhva rah ip 2,868 man tawh

Home minister K Sapdanga chuan BJP member Dr K Beichhua leh ZPM member Lalchhuanthanga zawhna chhangin, tun sorkar tharah dan loa Mizorama rawn lut kuhva rah ip 2,868 man a nih tawh thu a sawi.

Zawh belhna chhangin Home Minister chuan, kuhva rah mante chu kawl ṭhat a nih thu sawiin, "A mawhphurtute chu hren mek an ni. Thubuai siamsak an ni a, an thubuai ngaihtuah mek a ni. An thubuai ngaihtuah zawh a nih hunah hrem an nih dan a hriat theih ang," a ti.

MNF member Lalrinsanga Ralte-in kuhdam hrang hranga kuhva rah dah sorkarin a hriat leh hriat loh leh, kudama dahte chu phal loh a nih ve leh ve loh a zawhna chhangin K Sapdanga chuan, sorkarin kudamah kuhva rah dah a nih thu report a dawn loh thu a sawi.

Home Minister chuan, member-te'n kudama kuhva rah dah an hria a nih chuan chiangkuang deuhin sorkarah hriattir se a duh thu sawiin, "Mizoram chhunga thar chhuah bak kuhva rahte hi veivah pui phal a ni lo. Chuvangin man an ni ṭhin," a ti.