KHAWTHLIR

Nomination thehlut

MNF nomination committee-in an party elected officer bearer (OB) inthlan March 15, 2024 a neih tura official candidate atana an ruatte chuan nimin khan returning officer Dr Zoramdinthara (MZU) hnenah nomination an thehlut. Nomination hi February 28, tlai dar 5 thleng thehluh theih a ni a, thehlut an awm loh chuan official candidate-te tlinga puan an ni ang. MNF official candidate-te chu president-ah Zoramthanga, sr. vice president-ah Dr R Lalthangliana, vice president-ah Vanlalzawma leh Lalchhandama Ralte leh treasurer-ah Lalruatkima te an ni.

Mau zirchiang lo

ZPM member VL Zaithanzama zawhna ziaka chhangin Horticulture minister Prof. Lalnilawma chuan, Horticulture department-in Mizoramah mau zirchianna a la neih loh thu a tarlang.

Kanghlum

PC Lallawmkima (44), Lunglei Electric Veng chu February 25, Pathianni zan khan an chenna-inah a kanghlum. Thudawn danin, PC Lallawmkima hi amahin a riak a, an in Assam type chu zan dar 11:30 velah a kang. An in awmna hi a fal deuh hlek a, an ṭhenawmten kangmei a chhuak tih an hriat chuan a lo kang nasa hman tawh. Chhung lamah kawngka a kalh a, an ṭhelh mih chuan a lo kanghlum tawh. PC Lallawmkima ruang hi nimin khan vui a ni.

Consumer Rights Day

Lunglei district bawrhsap Ramdinliani hoin nimin khan a pisaah sorkar hotute leh pawl hruaitute'n World Consumer Rights Day, 2024 (March 15) hman dan tur an sawiho.

Raltlan zat

Home minister K Sapdanga'n ZPM member VL Zaithanzama zawhna ziaka a chhan danin, Mizoram sorkarin raltlan a chhinchhiah zat chu Manipur aṭanga rawn raltlan mi 9,248 (February 9, 2024 thleng), Myanmar aṭangin mi 32,161 (February 3, 2024 thleng) leh Bangladesh aṭangin mi 1,167 (January 25, 2024 thleng) a ni. Myanmar aṭanga rawn raltlante tan sorkar laipui aṭangin cheng vbc. 3 hmuh a ni tawh a, biometric leh biographic data hmanga chhinchhiah turin hmalak ṭan a la ni lo.