KHAWTHLIR

Aizawl DC R Lalram­nghaka chuan Aizawla Covid-19 No Tolerance Drive chhunga special team-te duty dan tur ruahmanna a tichhuak. Special team hi paruk din a ni a, chung mite chuan an chan huam chhung ṭheuhah chawlhkar khatah surprise check vawi hnih tal an nei ṭhin dawn a ni. Surprise check an tih loh ní-ah chuan dan pangngaiin an pisa ṭheuhah hna an thawk chhunzawm ang.

Nimin khan Serchhipa Brilliant Higher Secon­dary School NSS unit chuan Serchhip District Hospital-ah thisen unit 21 an pe a, petute hmeichhia 12 leh mipa pakua an ni. Nimin vêk khan Kolasib District Hospital-ah Krismas pualin mipa 10 leh hmeichhia pathumin thisen an pe a, petu zinga a tam zawk chu District Court-a thawkte an ni.

December 10, Ningani khan North Vanlaiphai VC thlan ṭhat a ni a, mipuiin vote an thlâk zawh hnuah vote tlate chhiar nghal a ni. Inthlanah hian MNF candidate pali, ZPM candidate pakhat leh Congress party candidate pakhat an tling a; hmei­chhia pakhat tih loh chu August 27, 2020-a inthlana tlingte vek an tling nawn nia thu dawn a ni.

MHIP General Headquarters chuan thuchhuah siamin, December 9, Nilaini zana  Dr  Lalṭanpuia thihna  leh a thih dan chu pawi an tih thu leh, a fate leh a chhungte an tawrhpui tak zet thu leh tun hnuah thleng tawh lo se an duh thu an tarlang. MHIP chuan, "Mizo hmeichhia zawng zawngte'n kan pasalte ṭanpui a, hmangaih taka dâwm kângin, kan zah tur a ni tih i hre thar leh ang u," an ti.

State Referral Hospital-ah Covid-19 vei mi 17 an awm mek a, an zingah kum 60 chung lam mi panga leh kum 14 hnuai lam pahnih an tel. SRH-ZMC Bulletin tarlan danin, mi 17 zinga pakhat chu ICU-ah enkawl mek niin, oxygen pek a ni a; Isolation ward-ah mi 16 awmin, an zinga pathum chu oxygen pek an ni. SRH-a enkawl zinga pakhat chu nimin khan a thi a, pahnih dang chu chhuahtir an ni thung.