Mitdel a tam thei ang duhsakna Pe turin MBS-in mipui an ngen

January 4, Inrinni khan khawvel puma mitdel hawrawp hman ṭan ní, World Braille Day a ni a, he ni pual hian Mizoram Blind Society (MBS) chuan thuchhuah siamin, mitdel lehkhathiamte chu thinhrikna leh enhniamna nei loa a tam thei ang bera duhsakna pe ṭhin turin Mizoram mipui an ngen.

MBS chuan, Mizoramah mitdel sikul pahnih a awm tih tarlangin, "Sikul pahnih aṭanga lehkha zir chhuak tawh mitdel, zirnaa hlawhtling tak takte leh sorkar hnathawk tawh mi eng emaw zat an awm tawh a ni. Mitdelte'n lehkha an zir ve tia sawi hian Zoram mipui tam zawk chuan anmahni pual bik liau liaua syllabus nei hrana lehkha zir ve thei chauh turah an ngai ṭhin hi a dik lo," an ti.

MBS tarlan danin, braille-a A AW B leh A B C an thiam hnuin zirna hniam ber aṭanga a sang ber thlenga mit ṭha pangngaite zirlai (syllabus) ang an zawm ve a, mitvarte zir ang zawng zawng an zir ve vek a ni. Higher secondary school, college leh university chinah chuan mitvar pangngaite zingah an zir ang an zir ve a, exam pawh mitvar pangngaite nen angkhat veka neiin, zawhna thu­-hmun an chháng ṭhin.

Mitdel zinga B.A, M.A leh M.Phil. thlenga zir tawhte chu mitvar pangngai, degree inangte nen an thiam dan leh an hriat chen a intluktlang vek tawh tih sawiin MBS chuan, "Mitdel lehkha thiam B.A, M.A leh a aia sang zo tawhte chu sorkar hna pek kawngah te, kohhran leh khawtlang tana rawngbawlna leh mawhphurhna pek kawngahte Pathianin thiamna leh theihna a pekte tam zawka an lo hman chhuah ve theih nan duhsak ni ṭhin 

se a duhawm hle a ni," an ti.