KHAWTHLIR
Thisen pe
IKK Ṭhalai Pawl, Siaha Pastor Bial chuan nimin khan Siaha District Hospital blood bank tan thisen unit 17 an pe a, petute mipa 13 leh hmeichhia pali an ni.
Jail tangte hriselna endik
Serchhip District Legal Sevices Authority chuan nimin khan Serchhip District Jail-ah Mental Health Camp leh a thlawna inentirna (free clinic) an buatsaih a; Serchhip district chief judicial magistrate (CJM) R Malsawmdawngzuala'n hmanpuiin, Serchhip District Hospital-a medical specialist Dr K Lallawmzuala, psychiatrist leh nurse-te'n jail tangte hriselna dinhmun an endik. Serchhip District Jail-ah hian jail tang mipa 50 leh hmeichhia pariat an awm mek a ni.
App. tlangzarh
Lunglei North bialtu MLA V Malsawmtluanga'n a bial mipuite harsatna sutkian a awlsam zawk nan leh bial a enkawlnaa thurawn leh sawisel ngaite thlen theihna tur mobile application 'MSTA' a siamtir chu February 26, Thawhṭanni zan khan Aijal Club-ah Vanlalsailova'n a tlangzarh.
VP nupuiin tlawh
Vice president Jagdeep Dhankhar nupui Dr Sudesh Dhankhar chuan February 26, Thawhṭanni khan Social Welfare, Tribal Affairs, Women & Child Development department hnuaia State Senior Citizens' Home, Ainawn Veng a tlawh a; home-a awm mi pakua hnenah thilpek a hlan bakah, thawktute leh home-a awmte nen an inkawm.
Zirtirtu training
Mizoram Youth Commission chairman Malsawmzuala Ralte chuan nimin khan MZU Incubation Centre-ah MZU leh college hrang hrang zirtirtute tana buatsaih '5 day non residential faculty development programme on entrepreneurship' a hawng. MYC Chairman chuan, "Tunlai khawvelah sorkar hna thawk tura tling theite chu mi taima fal, tumruh fal leh tei rei peih te an ni a, chutiang zinga tel lo zawng zawngte tana eizawnna leh mahni kea din theihna tur kawng, entrepreneurship kaltlanga dappui chu thil ṭul tak a ni," a ti.
RTI Training
Nimin khan Mizoram Information Commission office chuan Khawzawl DC Auditorium-ah RTI Act 2005 leh Mizoram RTI Rules 2010 chungchang training an buatsaih a, chief information commissioner John Neihlaia'n a hmanpui. Training-ah hian resource person MIC dy. secretary Lily-i chuan RTI chungchanga hriattur pawimawh hrang hrangte a sawifiah a ni.
Sipai ṭang duh inzirtirna
Nimin khan Army Recruiting Office (ARO), Aizawl chuan Kawnpui khuaah sipaia ṭang duh ṭhalaite tana hriat tur pawimawh leh ṭangkai inzirtirna hun an buatsaih.