Hlawhtlingte thawhrimna kan hmuh hmaih ṭhin - Education Minister

School Education minister Dr Vanlalthlana chuan nimin khan Mizo High School tualzawlah rampum huapa zirlai lawmman late lawmpuina leh Smart City hmalaknaa Primary School 121 hnena computer semna a hmanpui a; "Mi hlawhtlingte thawhrimna kan hmuh hmaih ṭhin," a ti.

Dr Vanlalthlana chuan, zirlaite chu lehkha ziak tam turin a fuih a, "Lehkha ziah tam hi chhiar ngawt ai chuan thluaka inkhawl chin a lo tam a, mamawh hunah a lo chhuak ṭhin. Mi hlawhtlingte hi an hlawhtlin hnuah nawm hmel deuhin kan hmu a, an thawhrimna kan hmuh hmaih ṭhin. Phur thuta mi hlawhtling nih tum ngawt chi a ni lo," a ti a, hlawhtlinna kalkawng - tumruhna leh thawhrimna chu a pawimawh lai a nih thu a sawi.

Zirlaite chu an nun kawng zawh mekah risk la ngam tur leh huaisen taka kal ngam tura chahin Education Minister chuan, "Khawvel hian mi dawihzep an hre reng lo, huaisente erawh chu an hre reng ṭhin. Hnathawh duh zâwng thlan thu-ah pawh huaisen taka ngaihtuahna hmanga sang deuh hlek nih tum ang che u," a ti a; harsatna karah beidawng mai lo turin a fuih.

School Education Minister hian Red Ribbon National Quiz Competition-a pakhatna, PES Republic naupangte leh zirtirtute, National School Band Competition-a lawmman pathumna dawngtu Govt. Mizo High School-te chu an thawhrimna chhuanawm a tih thu leh a lawmpui thu a sawi a; Smart City hmalaknaa Primary School 121-te'n computer an dawng chu a lawmpui thu a sawi bawk.