ZPM hi kut hnathawktute tan mangchhia - MPYCC

Mizoram Pradesh Youth Congress Committee (MPYCC) chuan nimin khan Vairengte leh a chhehvel khuaa hmunphiah chingtute harsatna an enfiah a; ZPM sorkar chu kut hnathawktute tana mangchhia an nih thu an sawi.

Aitlang rama hmunphiah chinna an tlawhnaah MPYCC president Laltawnliana chuan, Mizorama hmunphiah chinga eizawnna ṭha leh hlawk tak nei mi tam zawk chu NLUP aṭanga bulṭan an nih thu a sawi a, "Kum 2016 daih tawhah khan Vairengteah hmunphiah hring first class kg.1 Rs. 35, Saiphaiah kg.1 Rs. 40-tea hralh a lo ni daih tawh. Hemi kum pawh hian state pawnah hmunphiah Rs 42,69,470 man zet hralh chhuah a ni," a ti.

MPYCC President chuan kum tin hmunphiah man a san chho zel laiin kumin 2024-a sorkarin hmunphiah man nasa takin a ti chhia nia sawiin, "Inrawkna nasa tak a ni," a ti a; ZPM sorkar chu kut hnathawktute khaichhuaktu ni loin, kut hnathawktute tana mangchhia an nih thu a sawi.

Laltawnliana chuan ZPM sorkarin RR Associates-te inremna a siampui avangin kum danga hmunphiah latu dangte an inrawlh a rem tawh lo tih sawiin, "Sorkarin hmunphiah hralhna rate a siam leh si avangin RR Associates-te chuan chhuanlam siamin an inthiarfihlim san leh si a, harsatna tam tak a thleng. Tunah hian loh theih lohna vangin hmunphiah chingtute chuan kg 1 Rs. 13-15 in an sah tir a, engmah hlawkna an nei lo. An tawrhna hi a zual dawn chauh a ni," a ti.

Hmunphiah chingtute nasa taka an buai laiin Mizoram Chief Minister chuan, 'he thilah hian sorkarin thiam loh a nei lo, agent-te thiam loh a ni, kan tuar tlang a ni ber,' a ti chuan Chief Minister chu mawhphurhna la ngam lo a nih zia a tilang niin MPYCC chuan an tarlang.

Hmunphiah chingtute hian a hralh theih loh chhan ni loin, an hralh theih dan tur, a solution hi a ni an hriat duha, an mamawh tih tarlangin MPYCC chuan, "Hmunphiah chingtute hmunphiah thar hi a ranglama leisak thuai turin sorkar kan phut," an ti.

MPYCC tarlan danin, Kolasib district hi Mizorama hmunphiah thar nasa leh hmunphiah huan siam nasa ber a ni a, a bikin Vairengteah an tam a, hmunphiah chingtu pawl member chhungkaw 40 chuang an awm.

Tunah hian sorkar inrawlh miah lo turin hmunphiah leikhawmtute chuan an duh a, Silchar mihausate pawhin RR Associates leh sorkar inrawlh lo turin an duh a ni.