LMC-a lirthei dah phalna leh phal lohna sawiho

Lunglei Municipal Council (LMC) vice chairman K Lalrinawma kaihhruaiin nimin khan a pisaah sorkar leh NGO aiawhte'n LMC huamchhunga lirthei dahna (parking area) chungchang an sawiho.

K Lalrinawma chuan, Mizoram Municipal Act 2007 hnuaia LMC chhunga hnathawh theihna turin Draft Regulation leh By Laws paruk duan a nih thu a sawi a, "Chu'ng zinga mi The Lunglei Municipal Council (Control of Parking and Collection of Parking Fees Regulation) chu Cabinet pawmpui tura thawn niin, pawm a nih thuai beisei a ni," a ti a, lirthei dah phalna leh phal lohna hmun (parking zone & no parking zone) chu department kaihhnawihte nen thawhhona ṭha tak hnuaiah enho a ngaih thu a sawi.

Ṭhutkhawma tarlan danin, LMC Ward No. 2, 3, 4, 7 leh 8-ah parking area block 47 siam niin, parking fee hi block 14-ah khawn mek a ni.

Cabinet-in 'Control of Parking and Collection of Parking Fees Regulation' a pawm hunah LMC chhunga mumal taka traffic kalpui a nih theih nan parking zone leh no parking zone-te enfiah ṭhat ni se, an ti a; parking fee receipt pek te, overnight parking chungchang te, signage dah te, road marking te, garage neihte bakah, sumo stand leh truck hub neih theih dan turte an sawiho bawk.