Lungleiah Horticulture Exhibition-cum-Fair

Lunglei district bawrhsap Ramdinliani chuan District Horticulture office-in Mission for Integrated Development of Horticulture (MIDH) fund an dawn hmanga ni thum awh tur 'Horticulture Exhibition-cum-Fair, 2024' an buatsaih chu nimin khan Lunglei Agriculture complex-ah a hawng.

Ramdinliani chuan, sorkar laipuia Horticultur department nodal ministry, Ministry of Agriculture and Farmer Welfare chuan India ram hmun tin a tuamchhuak tih sawiin, "A ngaihna hre tan leh taima tan chuan sum haichhuah tur tam tak a awm a, lo neitute leh pangpar chingtute tana hamṭhatna awm theite pawh sorkara thawktute lam pawhin hriatzau tum a pawimawh hle," a ti.

Tunlai khawvelah mithiamte'n damdawi tel loa thlai leh thei enkawl an uar tawh thu sawiin Ramdinliani chuan, "Mizoram pawh organic state hialah kan inchhal tawh a, hetihlai hian ṭhahnemngaih luata chemical fertilizer la hmang hi kan loneitute zingah pawh an la awm nual niin a lang. Mihring kan hrisel zelna turin organic fertilizer hman kan uar zel a ṭul hle a," a ti a; sorkar aṭanga loneitute ṭanpuina chungchangah a petu tur department lamin ti ve tura loneitute an phûtte ṭha taka tihhlawhtlin chu loneitute mawhphurhna a nih thu a sawi.

Horticulture Exhibition-cum-Fair, 2024-ah hian mi 160 chuangin thlai thar, thei, pangpar leh thlai enkawlna hmanrua leh damdawite an phochhuak a; exhibition bikah mi 12-te'n item hrang hrangah inelna an nei.