Pianphunga mi dang phâk lote'n zahawm leh mawihnai taka khawsak an phu - Governor
Governor Dr Hari Babu Kambhampati chuan nimin khan Ephatha Special School-ah bengdar endikna leh bengdar khawl (hearing aid) semchhuahna a hmanpui a; "Pianphunga midang phak lote pawhin zahawm tak leh mawihnai taka khawsak an phu vek," a ti.
He hun hi Ephatha Society of Mizoram for the Deaf and Hard of Hearing leh Ali Yavar Jung National Institute of Speech & Hearing Disabilities (Divyangjan)-te ṭangkawp buatsaih niin, Governor Dr Hari Babu Kambhampati chuan, "Pianphunga midang phak lote pawhin zahawm tak leh mawihnai taka khawsak an phu vek. Kan chhehvela kan hmelhriatte zingah pianphunga harsatna tawk an awm chuan ṭanpui kan inhuam tlâng tur a ni," a ti.
Diagnostic & Fitment Camp for Hearing Impaired buatsaihna senso atan hian Governor chuan a thlawpzia lantir nan Rs 50,000 a thawh a; beneficiary-te leh zirlaite hnenah hearing aids a sem nghal a ni.