Sorkar laipui scheme hminga inbumna a tam

BJP Mizoram chuan thuchhuah siamin, tunlai hian sorkar laipui schemes hrang hrang hminga inbumna a tam thu an tarlang a; sorkar website-a gov.in tih awm lohna chu ring lo turin Mizoram mipui an ngen.

BJP Mizoram chuan, mi ṭhenkhatin website lem hmangin PM Modi schemes kaltlanga a thlawna pawisa dawn theihnate bakah, laptop, phone leh ṭhalaite bum theihna tur hmanga mi bum duh pawl an awm thu an tarlang a, "Central sorkar website-a gov.in tih awm lohna chu ring miah loh turin Mizoram mipuite kan ngen a ni," an ti.

BJP Mizoram tarlan danin, India Post tih leh central sorkar hming chawi website lem (fraud) tam tak a awm a, hengahte hian a thlawna pawisa dawn theihna ni awm takin mipui an bum ṭhi. Pawisa dawng loin mipuite chuan an chàn phah ṭhin zawk.