FMR ṭhiah leh ramri hung tum duh lohna official resolution House-ah pawm a ni

Nimin Assembly session-ah Home minister K Sapdanga official resolution 'sorkar laipuiin free movement regime (FMR) tihtawp a tum leh ramri hung a tum duh lohna' chu lungrual taka pawm a ni.

Home Minister chuan, 'Sorkar laipuiin FMR tihtawp a tum leh Myanmar nena kan inrina, ramri hung a tum hi ṭha kan ti loa, ti lo turin kan ngen a ni. Dik lo taka British sorkarin 'divide and rule policy' hmanga Zofate min ṭhendarh hi rorelna pakhat hnuaia kan kun leh theihna turin hma min lakpui zawk rawh se' tiin official resolution a pulut a ni.

A resolution putluh sawi zauin K Sapdanga chuan FMR leh ramri hung chu mitinin kan vei leh ngaihven tlan a nih thu a sawi a, "A ṭha zawngin emaw, ṭha lo zawngin ngaihven a hlawh zui rei viau thei. Zofate hi khaw chhak aṭanga tla thla. India, Bangladeh leh Myanmar-a ramri neia kan awm hma-a tlang hrang bawha mahnia khawsa ṭhin kan ni," a ti.

Home Minister chuan British-in min run a, min awp khan, awpbeh kan awlsam nan min ṭhendarh ta tih sawiin, "Hnam khat ni ta chu rorelna khat hnuaia kan awm duhsaktu British zingah pawh an awm ve tho," a ti a, January 29, 1892-a Kolkata-a Chin Lushai Conference koh a nih phah thu a sawi.

Kolkata-ah hian Zofate ram khat leh rorelna pakhat hnuaia kan awmna atan thutlukna siam a nih thu sawiin K Sapdanga chuan, "He thutlukna hi tihpuitlin a ni lo. Bristish-in min ṭhendarh a, Myanmar, India leh Bangladesh-ah ramri daidanin min ṭhendarh. Engtik niah emaw chuan he barh luih ramri hi tihbo a la ni ang," a ti.

K Sapdanga chuan rorelna pakhat hnuaiah kan la awm ngei ang tih chu Zofate thinlungah beiseina nung a nih thu sawiin, "Chutiang chu kan rilru a nih laia min ṭhendarh lehzualna tura hmalakna reng reng, FRM tihbo emaw ramri hung hi Zo hnahthlakte tan thlawp theih a ni lo," a ti a, dodal zel chu kan mawhphurhna a nih thu a sawi.

Home Minister chuan FMR tihtawp tum thu leh ramri hung tum hi sorkar laipui aṭangin ziaka dawn a la ni lo tih sawiin, "Nimahsela, sorkar laipui hian kaltlangpui ngei a tum thu hi media hrang hrang aṭang leh sorkar laipui hotu ṭhenkhatte thusawi aṭangin a chiang tawk viauah a ngaih loh theih loh. A tak lo chang ta se, a khua leh tuite tawrhna thlen dan tur hi sorkar laipui hian a hriat lawk a ṭul," a ti.

K Sapdanga sawi danin, chief minister Lalduhoma chuan Union Home Minister hnenah FMR hi tihtawp a nih a, Indo - Myanmar hung hi kalpui tum a nih pawhin Mizoram bik hi chu huam tir ve lo turin a lo ngen tawh a ni.

Chief Minister thusawi :

Chief minister Lalduhoma chuan khawvel awm tirh ata hriat theih chinah inkalpawh khap a ni ngai lo tih sawiin, "Ram pahniha thisen inzawmte inkalpawh theihna hi ṭhiah a ni ngai ang tih rinna tunhma roreltute pawhin an nei ngai lo. Ṭhiah tumna awm ngai lo. guideline siamṭhat erawh a awm ṭhin," a ti.

FMR ṭhiah leh ramri hung tumnate a rawn ri tih sawiin Lalduhoma chuan, "A chhanah Manipur Chief Minister kan puh ber a, ani hi a tlatlum deuha kan ngam lo a ni angte kan ti. Pakhatah chuan kan zir loh a nive tlat," a ti a, kan sorkar hmasate koh chhuah a nihna chen a awm thu a sawi.

MNF kaihhruai sorkarin Myanmar leh India ramri hung duhna resolution vawi hnih an pass tawh tih sawiin Lalduhoma chuan, "Resolution thehluttu mimal ngaihdan a ni lo, party ngaihdan a ni. Central sorkar hian kan mitmei an hmu," a ti.

Chief Minister chuan resolution putluh a nih laia CM-in Delhi-a a kal apiangin Prime Minister leh Chief Minister ramri hung tura a ngen ziah thu a sawi chhuak tih sawiin, "A ngenin an ngen a ni," a ti a, MNF sorkar laia resolution hi kan tuar ta a tih loh theih loh thu a sawi.

An resolution hnukdawk tura an ngen thu sawiin Lalduhoma chuan, "In hnukdawk loh chuan hnam pawikhawihnaah kut kan sil ang tiin House aṭangin kan chhuak. Tunah a resolution puluttute nen ngei ramri hung duh loh thu kan sawi tlang a, kan lungrual tlang ta hi a lawmawm. Hnamah kan chiang tlang tain ka hria," a ti.

Leader of Opposition :

Leader of opposition Lalchhandama Ralte chuan Mizoram Assembly House-ah ramri hung chungchang hi sawiho leh pass a nih tawh thu sawiin, "Keimah ngei pawh hi private member resolution lo pulut tawhtu ka ni. Hetiang sawihona-a ka tel leh thei hi ka tan chuan hun ṭha a ni," a ti.

Lalchhandama Ralte chuan kum 2007 bawr vela kan ram politics leh khawchhak lam unaute nena kan boruak thlirin an tih awm tak an tih thu sawiin, "MNF Legislature Party rel angin resolution ka pulut ta a ni," a ti a, khatih lai khan Myanmar-a kan unaute nen tun anga kan boruak a ṭhat loh thu a sawi.

Myanmar lam aṭanga rawn chhukten pawi an khawih nasat thu sawiin Leader of Opposition chuan, "Pawngsual leh naupang thahte a thlen avangin unau hmel kan hai a, kan inhnawt chhuak a ni. Mizo 2 tih ṭawngkamte a chhuah phah. NGO-te pawhin inkalpawhna mumal tak neih a hun lo an ti. Mizo mipuite himna atana ti kan ni," a ti.

Lalchhandama Ralte chuan tunah chuan FMR ṭhiah leh ramri hung an party-in an duh loh thu sawiin, "Party-in kan ngaihdan kan puang tawh. Official resolution a luh loh chuan private member resolution putluh kan tum. Kan harsatnaahte kan intuamhlawm chhoa, unau kan nih kan inhre chho leh," a ti a, hnam issue-ah chuan lungrual takin eptu leh ruling-te House-ah an awm ṭhin thu a sawi.