Governor-in MLA leh MDC nih kawp a ngai pawimawh - Chief Minister

Nimin Assembly session-ah chief minister Lalduhoma chuan MLA ni mek zingah MDC nikawp an awm thu sawiin, "Governor-in a ngai pawimawh," a ti.

MNF member Robert Romawia Royte-in 'Tun hnai sorkar thar din hnuah autonomous district council pathumte internal affairs (an chhungkaw rorel) chungchangah Governor thupek niloin DCMA department a inrawlh em,' tih zawh kalzelah Chief Minister chuan hmalakna a nih chhan a sawifiah.

Chief Minister chuan ADC-te'n MDC leh MLA nih kawp theih lohna dan an neih bakah state pawhin a nei tih sawiin, "Tuna kan MLA zingah MDC nikawpte an awm a, Governor-in a ngai pawimawh. File-in zawhchian tur a tih angin Governor thuneihnain a kal. Nih kawp theih lohna dan an bawhchhia-a a lan avangin zawhchian turin a ti a ni," a ti.

Lalduhoma sawi danin, MDC leh MLA nikawpte hi dan an bawhchhia a nih chuan MLA aṭanga ban theitu chu Governor ni loin, Assembly Speaker a ni.

Assembly speaker Lalbiakzama pawhin MDC leh MLA nikawpin dan an bawhchhia a nih chuan a ban leh ban loh chu speaker thuneihna liau liau a nih thu a sawi.

Robert Romawia zawhna hi DCMA minister C Lalsawivunga chuan ADC pathumte internal affairs-ah Governor thu loin DCMA a inrawlh hriat a nih loh thuin a chhang.