PMJVK hnate kan endik dawn - Sports Minister

Sports minister Lalnghinglova Hmar chuan nimin Assembly session-ah PMJVK sum hmanga an department hnuaia hnathawh hrang hrangte endik a nih dawn thu House a hrilh.

INC member C Ngunlianchunga chuan PMJVK hnuaia Lawngtlai Vengpui YLA Field siam hna chu a chhiat thu a sawi, "Hna an thawk chhe em em a ni. Hei mai pawh ni lo Lawngtlai district chhungah hian PMJVK sumin hna tam tak thawh a ni a, a ṭha lo hlawm hle. Mizoram State Project Monitoring Committee-te'n min endik sak thei se ka duh," a ti.

Sports Minister chuan C Ngunlianchunga'n hna chhia a tihte chu a hmunah kala a enfiah tur thu sawiin, "Heng chang lo pawh PMJVK aṭanga thawh a awm a, kan lakhawm mek," a ti a, a ziak ang ngeia hmawrbawk a nih theihna atan theihtawp an chhuah dawn thu a sawi.

Lalnghinglova Hmar chuan MLA inthlan dawna Rajiv Gandhi Stadium-a artificial turf phah chu department-in a hriatpui loh thu ZPM member VL Zaithanzama zawhna chhangin a sawi a, "Sanction zat department-in a hre lo. Hnathawh ṭan hun pawh hriat a ni lo. Administrative approval, tender leh sanction pawh sorkar ang chuan a awm hran lo," a ti.

ZPM member Jeje Lalpekhlua zawhna chhangin sorkarin sports association tihchangtlun leh infiammite tih hmasawn lam sorkarin a tum thu sawiin, "District leh state level intihsiaknate buatsaih tam kan tum," a ti a, sports association che ṭhate hnenah incentive cash pek tum a nih thu a sawi.

Sports Minister sawi danin, artificial turf phah tum tawh lohna a awm loa, dil mekte pawh a awm. State sum ni loa kalpui hram hram tum a ni thung.