KHAWTHLIR

KṬP inkhawmpui lian

KTP General Conference vawi 60-na chu zanin hian Ngopaah ṭan a ni dawn a, vawiin hian palaite'n Ngopa an pan ang. Inkhawmpuina atan hian Ngopa khelmualah pandal sak a ni a, zanin hian palai lawm inkhawm neih a ni dawn. Inrinni chhunah rorel palaite'n ro an rêl dawn a, Pathianni zanah inkhawmpui a ṭiak ang.

Centenary lawm

Govt. Primary School-I, Tlangnuam, Aizawl chuan nimin khan an kum 100 (centenary) tlin an lawm a, bialtu MLA Lalchhuanthanga'n a hmanpui. Tlangnuam Govt. PS-I hi kum 1924 a din a ni a, bulṭan a nih lai hian Tlangnuam Presbyteian Kohhran hmunhmaah sikul a awm ṭhin. Kum 1954 khan provincialised a ni.

Scheme inhrilhfiah

Sorkar laipuia Central Bureau of Communication Field Unit, Aizawl chuan tunhnai khan T Romana College auditorium-ah 'Integrated of Communication & Outreach Programme on 9 Years of Seva, Sushashan & Garib Kalyan' an buatsaih a; sorkar laipui scheme hrang hrang - hriselna, hmeichhiate chawikanna, zirna, mi retheite dawmkanna, gas connection chungchang leh thil pawimawh dangte an sawifiah.

Chuhtu awm lo

March 15, 2024 a MNF office bearer inthlan tur atana hming pekluh hun chu nimin chawhnu dar 2 khan a tawp a, official candidate-te chuhtu an awm lo. MNF OB official candidate-te chu president-ah Zoramthanga, sr. vice president-ah Dr R Lalthangliana, vice president-ah Vanlalzawma leh Lalchhandama Ralte leh treasurer-ah Lalruatkimate an ni.

MZU-ah seminar

Ni thum awh tur 'School of Humanities and Languages buatsaih Three Day International Seminar on Environmental Justice: Representations in Literature, Culture and Philosphy' chu February 27, Thawhlehni khan MZU vice chancellor Prof. Dibakar Chandra Deka-in a hawng. Seminar-ah hian Mizoram, India leh ram hrang hrang aṭanga mithiam kal khawmte chuan an thuziah an chhiar dawn.