Power lama hmalak tum dan sawi

MNF member Ramthanmawia zawhna chhangin Power & Electricity minister F Rodingliana chuan hydel project leh solar hmanga sorkarin power siam chhuah a tum dan House a hrilh.

F Rodingliana chuan tunah hian small hydro electric project power pe chhuak thei 15 kan nei mek tih sawiin, "An vaia an thar chhuah theih chu Mw. 38.55 a ni. Amaherawhchu, power a siam chhuah theih zat hi khaw awm dan a zir zelin danglam reng ṭhin. Tin, heng small hydel project zinga ṭhenkhatte chu thuamṭhat hna thawh mek an ni," a ti.

P&E Minister sawi danin, Tlawng HEP (120Mw), Lungleng bul chu Survey & Investigation (S&I) tih mek a ni a, DPR 2024 chhungin zawh hman beisei a ni. Tuirini SHP (24Mw), Sesawng bul S&I tihfel tawh a ni a, DPR pawh peih fel tawh sa a ni. A thawhna tur sum ngaihtuah mek a ni. Hei bakah hian Ngopa bul Tuivai HEP (150Mw) siam tum a ni.

Solar power siam chhuah lamah pawh sorkarin theihtawp a chhuah thu sawiin, "Tunah hian Thenzawl bulah Grid Connected SPV Power Plant (Solar) 10MWP thawh ṭan mek a ni," a ti.

Hmalakna tur dang :

▶ Thenzawl Solar Plant, 10MWp - Thawh mek a ni.

▶ North Vanlaiphai Solar Plant, 20MWp - PPA sign tura hmalak mek a ni.

▶ Sumsuih Solar Plant, 5MWp - state plan aṭangin thawh tum a ni a, administrative approval pek chhuah tawh a ni.

▶ Keifang Solar Plant, 10MWp - PPA Mizoram Energy Development Agency (MEDA)-te nen sign tawh a ni a, hmalak mek a ni.