Thlai hralh chhuah dan turah sorkarin ruahmanna a siam - Agriculture Minister

Agriculture minister PC Vanlalruata chuan thlai thar hralh chhuah dan turah sorkarin ruahmanna a siam thu nimin Assembly session-ah House a hrilh.

MNF member Lalrinsanga Ralte zawhna chhangin PC Vanlalruata chuan, "Kum 2024-2025 chhung hian sorkarin kuthnathawktute tan ruahmanna chi hrang hrang - Rashtriya Krishi Vikas Yojana leh Krishonatti Yojana hnuaiahte a siam. Annual action plan siam tawh niin, central-ah thawn thlak a ni tawh," a ti.

Agriculture Minister chuan zau hrang hrang enkawl dan turah sorkarin ruahmanna a siam mek tih sawiin, "Sorkarin zau a ngai pawimawh dawn. Thar chhuah hralh dan turah pawh ruahmanna siam a ni," a ti a, thlai thar hralhna leh thildangte ngaihtuahtu tur board pawh sorkarin a dinfel tawh thu a sawi.

Chief Minister-in kuthnathawktute a ngaih pawimawh avangin thlai thar leina tur cheng vbc. 110 dah nghal a nih thu sawiin Agriculture Minister chuan, "Chutihrualin department lam kan la inpeih hman lo. December-ah sorkar a piang a, a channel-te siam a ngai si. Society-te din a, lei tum a ni. Hmunphiah leite pawh duh viau mah ila, sorkar a kal chak rualin a la inpeih hman lo," a ti.

Agriculture Minister sawi danin, Aizawl kawtchhuaha hmun lia thlai thar wholesale market siam turah a hmunhma ngaihtuah mek a ni a, ruahmanna felfai tak neih tum a ni.