Minister-in Art and Photo Exhibition a hawng

Information and Public Relations minister Dr Vanlalthlana chuan nimin khan Vanapa Hall Lobby-ah Chapchar Kut 2024 Art and Photo Exhibition a hawng. Exibition hi vawiinah chhunzawma naktuka khar tur a ni.

Dr Vanlalthlana chuan, ram hmasawnna pholan nan arts chawisan zel a pawimawh thu sawiin, "Mizo ṭhlalaite'n national level mai ni lo, international level thleng pha thei tura theihtawp chhuah a ṭul," a ti.

Hawnna inkhawm hi IPR secretary Teresy Vanalhruaii'n a kaihruai a, Mizoram Art Development Society President leh Mizo Photographers Society President te'n report an pek bakah, IPR director C Lalnunkima pawhin thu a sawi.

Chapchar Kut Art & Photo Exhibition-ah hian thlalak 120 phochhuah niin, lemziak 75, woodcarve pakhat leh sculpture pakhat dah a ni a; artist-te kutchhuak hi a duh tan lei nghal theih a ni.