Vawk leh a sa khuahkhirhna chhuah

Aizawl district bawrhsap Nazuk Kumar chuan Aizawl district-ah vawk leh vawksa khuahkhirhna thupek a tichhuak a; thupek zawm lote chu IPC Section 188 hmanga hrem theih an ni.

Bawrhsap chuan, "Vawk hri hlauhawm tak African Swine Fever (ASF) chuan min la kiansan thei loa, Aizawl district mipuite he hri laka kan lo him a, kan lo fimkhur zel nan vawk chungchangah inkhuahkhirhna thupek chhuah a lo ṭul leh ta a ni," a ti a, Aizawl district huam chhunga mipuite chu thupek hi zawm turin a ngen.

Vawk khuahkhirh dan

☑ Aizawl district chhungah ram dang (foreign) aṭanga vawk, vawksa leh vawksa aṭanga siam eitur chi reng reng lakluh khap tlat a ni.

☑ State dang leh district dang aṭangin vawk, vawksa leh vawksa aṭanga siam eitur reng reng lâkluh khap tlat a ni.

☑ Vawk damlo reng reng talh leh hralh khap tlat a ni a, vawk damlo chu dah hran vat tur a ni. Vawk thi reng reng thûk taka phum bo tur.

☑ Vawk damlo leh thi an awmin AH & Vety department hotute hnenah hriattir vat tur a ni.

☑ Aizawl District chhung khua leh khua emaw, veng leh veng emawa vawk inlakpawh tawn tur reng rengin vawk hrisel ṭha ngei a ni tih hriatpuina AH & Vety department hnenah lak tur a ni.

☑ AH&Vety Director aṭanga phalna neite tan ASF hrilên lohna state aṭangin vawksa aṭanga thil siam (frozen pork) lakluh phal a ni. Amaherawhchu, Standard Operating Procedure zawm ngei tur a ni a, APEDA / ESSAL-in a pawmpui firm an ni bawk tur a ni.