MRB-in 2015-16 ah vbc. 16.45 an hlêp

Mizoram Rural Bank Officers Association (MBOA) chuan nimin khan Chanmari YMA Hall-ah 14th Biennial Conference an hmang. Financial year 2015-16 chhunga an hlêp (gross profit) chu cheng vbc. 16.45 a nih thu an tarlang.

MBOA conference an president F Lalhmangaiha'n a kaihruai a, Federation of Mizoram Government Employees & Workers hruaitute kaihhruaiin kum 2016-18 chhunga hruaitu turte an thlang a, an dinhmun thlirletna hun an hman bakah, pawl hmalakna turte an rel.

Conference-a an sawi lan danin, Mizoram Rural Bank hian tun hnai kum hnih chhungin India ram pumpui SBI sponsor regional rural bank zingah Top Performer Award 2014-15 te, Prime Minister Employment Generation Programme (PMEGP) - Best Performance in Margin Money Utilisation 2014-15 leh SBI Life Highest Booked Premium FY 2014-15 te an dawng a ni.

MRB hian financial year 2015-16 chhungin cheng vbc. 16.45 hlêpin, an net NPA chu 3.58% a ni a; tunah hian Mizoramah branch MRB 78 an nei mek a, branch thar paruk hawn belh thuai an tum. Community Banking Service scheme hmangin chhungkaw retheia mi zirlai naupang 394, pawl 9 leh 10-te an zirna man an tumsak tawh bawk.