Chief Minister hmuah danah MPCC an lawm

Congress party chuan thuchhuah siamin, chief minister Lal Thanhawla Myanmar-a Mizote'n ropui taka an lo hmuakin, pa chan an lo chantir nia sawiin, lawmawm an tih thu an tarlang.

MPCC thuchhuah chuan, CM Lal Thanhawla te nupa chu sâwm an nih angin Tahan-a Chapchar Kût hmangin an kal tih a tarlang a, "Tahan-a Mizote'n an chawimawi hi Zofate inpumkhatna kawnga sûlsutu ṭha ber leh pawimawh ber niin kan ngai a, Mizo leh Zo hnahthlak zawng zawngte tan Myanmar rama CM-te nupa zin hi thil chhinchhiah tlak leh hriatreng tlak a nih ngei kan beisei," an ti.

MPCC chuan, Lal Thanhawla chu kum 2014-ah Myanmar ram Chin state-a Zo hnahthlak zawng zawngte'n chawimawi an tum tawh a, tuilian vangin ramri an kân thei lo niin an sawi a; Manipur-a Zo hnahthlakte leh Tripura-a Mizote pawhin nasa takin an chawimawi tawh niin an sawi bawk.