KHAWTHLIR

Chapchar Kut

Mizote kut ngaihhlut ber Chapchar Kut chu vawiin hian Mizoram hmun hrang hrangah lawm a ni dawn a, Aizawlah chuan Lammualah lawm a ni ang. Lammuala Chapchar Kut lawmnaah chief minister Lalduhoma chu Kut Pa a ni dawn a, Art & Culture minister C Lalsawivunga chu Kut Thlengtu a ni ang. Chapchar Kut Organising Committee chuan kut lawmnaah hian mipuite tel turin an sawm a, 'Chawnghnawh' neih a nih dawn avangin a kal turte chu artui keng turin an hriattir.

MPSC member

Governor Dr Hari Babu Kambhampati chuan Mizoram Public Service Commission (MPSC) member atan PB Lianthangpuii, MIS (rtd), Dawrpui Vengthar a lalut. PB Lianthangpuii hi MPSC member pahnihna a ni. MPSC member thar lakluh inkhawmah hian chief minister Lalduhoma, Assembly speaker Lalbiakzama, Lokayukta chairman C Lalsawta leh official pawimawh dangte an tel.

Dan inzirtir

Lunglei District Legal Services Authority ( DLSA) buatsaihin nimin khan RD conference hall, Hnahthialah Mizo dan leh hrai, hmeichhe dikna chanvo leh dan in hmeichhia-te a humhalh dan inzirtirna ‘The Mizo Marriage, Divorce & Inheritance of Property Act and Laws relating to Women’ buatsaih a ni. Campaign-ah hian tlawmngai pawl aiawh, Govt. Hnahthial College zirlaite leh thuthar thehdarhtute an tel.

MZP-in kawm

MZP hruaitute chuan nimin khan Education minister Dr Vanlalthlana a pisa-ah an kawm a, Mizoram zirna enkawltu tur bik Mizoram Education Service (MES) din turin an ngen. Minister chuan Education Reforms Committee-in an zirchian mek thuin a lo chhang. MZP chuan Mizoram zirna in hma a sawn zel theih nan leh a enkawltu mumal tak an awm theih nan MES din turin sorkar thuneitute vawi tam tak an ngen tawh ṭhin thu an tarlang.