RD Minister-in ram pawna hralh turin Mizo hmarchha leh sawhthing a vailiam

Ropuiliani Women Farmer Producer Company Ltd.-te tharchhuah Mizo hmarcha metric ton 10 leh sawhthing metric ton 18 chu nimin zing khan Ch. Saprawnga Truck Terminal, Rangvamual aṭangin Rural Development minister Prof. Lalnilawma'n a vai liam.

Prof. Lalnilawma chuan flag off programme chu suangtuahna a tak rama chang ta ni maia a ngaih thu sawiin, "Market zawnna kawngah inrintawnna a pawimawh hle. He flag-off programme hi hmalak ṭanna, chona thar inṭanna a ni. Kuthnathawktute’n hlawkna tam thei ang ber an dawn theih nana hmalak chu sorkarin a ngai pawimawh," a ti.

RD Minister chuan MzSRLM-te chu sorkar kut leh ke tichaktu an nih thu sawiin, "Sorkar pawhin MzSRLM hmalakna chu theihtawp chhuahpui a tum. Thlai thar leitu Sus Agri Development Pvt. Ltd.-te nen hun kal zelah thawhhona ṭha neih zel kan duh," a ti a, thawhhona chu kuthnathawktute leh company-te tan ve ve hlawkna thlentu a nih a beisei thu a sawi.

Thusawitu dang adviser to CM Dr KC Malsawmzauva chuan Mizoram economy chu mamawh leh tharchhuahin a kaihhruaiah chantir pawimawh a tih sawiin, "Sorkar hmalakna thar 'Bana kaih policy' hnuaia state thar thlai chi li - hmarcha, aieng, sawhthing leh hmunphiahte chu kuthnathawktute’n market ṭhat loh lai pawha an hloh loh nan a man tum sak an ni anga, kan lei sak zel dawn," a ti.

He hunah hian producer company leh buyer aiawhten inremsiamna thuthlung an ziah bakah, pawisa an inhlan nghal. Heng thlai thar leitu hi Sus Agri Development Private Ltd. Bengaluru, Karnataka an ni a, Gujarat-ah phurthlain, India ram pawnah thawn chhuah an tum.

Ropuiliani Women Farmer Producer Company Ltd. hi MzSRLM hnuaia sub-scheme pakhat Mahila Kisan Sashaktikaran Pariyojana (MKSP) Value Chain Project kaltlanga din a ni. He company kaltlang hian MzSRLM hnuaia Self Help Group member hmeichhiate chu shareholders a ziahluh an ni. Sawhthing, Mizo hmarcha leh aieng hralhna mumal zawk an neih theih nan hmalakna kalpui mek a ni.

He hmalakna kaltlang hian Mizoram chhunga district pasarih (Champhai, Khawzawl, Saitual, Aizawl, Serchhip, Mamit, Kolasib District) leh block 15 (Champhai, Khawbung, Khawzawl, Ngopa, Phullen, Aibawk, Thingsulthliah, Darlawn, Serchhip, East Lungdar, Reiek, West Phaileng, Zawlnuam, Thingdawl, Bilkhawthlir) tuamchhuah vek tum a ni.

Ropuiliani Women Farmer Producer Company hian Khawbung RD Block leh Khawzawl RD Block hnuaia Self Help Group member hmeichhia shareholders khaw hrang hrang hnen aṭangin sawhthing leh Mizo hmarcha a leikhawm mek. Sawhthing hi kuthnathawktute hnen aṭangin kg. khat Rs. 53-70 in an lei a, Mizo hmarcha chu kg. khat Rs 340-390 in an lei thung.