Chapchar Kût hlim taka hman a ni : Kan hnam kan zahpui tur a ni lo - Kût Pa
Nimin khan Mizoram hmun hrang hrangah Mizote Kût ngaihhlut ber Chapchar Kût hman a ni a, Aizawlah chuan Lammualah hman a ni . Kût Pa Lalduhoma, chief minister chuan Mizo hnam thuam leh nunphung duhawm tak takte zahpui lo turin Mizo mipuite a chah.
Chapchar Kût lawmnaah hian Mizo hnam lam, hnam zai, hmanlaia Mizo naupang infiamna leh thil dangte en tur leh ngaihthlak tur awmin, chawhnu lamah concert buatsaih a ni a, mi ṭhahnem takin Kût hi an lawm. Kût lawmna pual hian Chapchar Kût Flower Show, Chapchar Kût Run, Chapchar Kût Art & Photo Exhibition-te buatsaih a lo ni tawh.
Kumin hian kum danga tih ngai loh angin Vanapa Hall leh Lammual chhimlam gate inkarah dawr eng emaw zat hawn a ni a, helai hmun hi No Vehicle Zone atan February 29 chawhnu dar 2 aṭanga tlai dar 5 thleng leh nimin zing dar 8 aṭanga tlai dar 5 thleng puan a ni.
Kût Pa chuan, khawvel changkang zelah inbiakpawhna a ṭha tawh hle tih sawiin, "Hnamdangte nunphung kan hmu tamin kan entawn nasa ta hle mai. Mahni hnam ze ṭhate kalsanin mite entawn reng rengin nun kan hmang ral ang tih a hlauhawm ta. Kan ṭawng te, kan irawm chhuak thu leh hla te, kan hnam lam leh rimawi te, kan hnam thuam mawi tak tak te, hmakhawsang ata kan inhlan chhawn kutthemthiamna thilte leh kan nunphung duhawm tak takte hi kan tibo tur a ni lo a, kan zahpui tur a ni hek lo," a ti.
Hnam changkang zawkten tunlai changkanna vanga an hnamzia leh nunphung an kalsan an hre ngai lo tih sawiin Lalduhoma chuan, "Thiamna thar lo chhuak zelte hmangin an chawimawiin an thehlar zawk a nih hi. Keini pawhin chu chu kan ti ve thei a ni. Chhuang takin kan hnam tihdan ṭhate hi kan thehdarhin kan nunpui zawk tur a ni," a ti a, Chapchar Kût chu Mizo hnamin thehlar tur a neih hrang hrangte thehdarhna hun ṭha a nih thu a sawi.
Pi leh puten hun harsa tak tak an tâwk ṭhin tih sawiin Lalduhoma chuan, "Indona leh hmun ralṭiah, dam leh tlang khatah, thih leh ruam khatah an ti ṭhin. Ṭampu mitthi sem sem dam dam, ei bil thi thi an ti a, mahni hmasial takin tumah an nung lo. An neih ang ang insemin eui tur tlachhama min an awmin an phal lo. Ram chhan nan tawrh ka huam ṭhin nge, ram mipuite chanai ka eiru, ṭhenawmte tan mi ṭangkai nge, hnawksak, ram damna thlentu nge hliampui tawrhtirtu ka ni ṭhin tih i in zawt ṭheuh ang u,"a ti.
Kût Thlengtu C Lalsawivunga, Art & Culture minister chuan, Mizote'n Kût chi thum - Mim Kût, Pawl Kût leh Chapchar Kût kan neih thu sawiin, "Kan Kût ropui ber leh mitin huap awm chhun chu Chapchar Kût kan ti thei ang. Loh vah zawh, vah chap phoro hunlaia hman ṭhin a nih avangin Chapchar Kût tih a ni. Hun a danglam zela hman dan a danglam zel. Tunah phei chuan sorkarin a hman hun a ruat a, pisa chawlhah a puang ta," a ti a, Chapchar Kût chu Zofate tana ni pawimawh tak a nih thu a sawi.
Inlawmna thusawitu Central YMA president Lalhmachhuana chuan, "Kan ṭhenawmah kan unaute hun hlimawm hmang thei lo, hun harsa takin a tuam mek an awm a, kan theihnghilh lo che u. Pathianin hun ṭha min pe anga, kokim zawkin hman leh theih kan beisei. Chapchar Kût hi pi leh puten harsatna leh buaina tam tak an tawh karah an hmang ṭhin a, an hahchawlh vena hun a ni. Lawm ila, hlim ila, a timawitu leh ti ropuitu ni thei turin ngaihtuahna i hmang ang u," a ti.
Chapchar Kût lawmnaah hian Mizo hnam lam, hnam zai, hmanlaia Mizo naupang infiamna leh thildangte en tur leh ngaihthlak tur awmin, chawhnu lamah concert buatsaih a ni a, mi ṭhahnem takin Kût hi an lawm.