Tlâk huamin thil ṭha kan ti ngam - CM

Nimina Lammuala Chapchar Kût lawmnaah chief minister Lalduhoma chuan, tlâk huama thil ṭha tih an ngam thu sawiin, thil ṭha tih duhte chu zam lo turin a chah.

Chief Minister chuan, Mizoram chu ruihhlo tamna, nun pawlawh avanga HIV/AIDS vei tamna, zuk leh hmuam tih nasat avanga cancer tamna, nupa inṭhen tam em em na, mihring dam rei lohna ram a ni mek tih sawiin, "Sum leh pai inrûk sak leh thlai inrûk sak a hluar em em a ni. Kan bank account-a pawisa thlengin in rûk sak dan kan dap ta. Kan nunphung dik lo hi mihring chauhin kan tuar lo, kan rama nungchate leh sik leh sa pawhin a tuar," a ti.

Mizoram dinhmun a chhiat mek laiin, ram leh hnam damna atana ṭhahnem ngai taka beitu tam tak an awm tih sawiin Lalduhoma chuan, "Theihtawp chhuaha khawtlang siamṭha tura beitu, ṭhalaiten nun kawng dik an zawh theihna atana kawh­hmuhtute, eiru duh re re lote leh Mizoram tana ṭhahnem ngai taka ṭawngṭai ṭhin sang tam tak an la awm," a ti a, ṭhalaite zingah pawh ram leh hnam tana theihtawp chhuah a, rotling nih tum sang tam tak an awm thu a sawi.

Chief Minister chuan ram leh hnam ṭhatna tura mahni zawn ṭheuha theihtawp chhuahtute chu beiseina meichher chhi tute an nih thu sawiin, "Nghet takin ding zel ang che u. Zam suh ula, beidawng hek suh u. Kan ram leh hnam chhana, tungding tur hian in hmaa kal turin kan inpeih a, kawng dik zawh turin 'kan pal hi a tliak lo a nih vaih chuan kan ngal zawk tal a tliak ang' tiin, tlâk huamin thil ṭha tih kan ngam a ni," a ti.

Lalduhoma chuan ram leh hnam humhalh tumna kawngah hnam dang leh ram dang mite hmusit zawng emaw, anmahni haw zawnga chet lâk loh hram tum a pawimawh tih sawiin, "Mizo nihna leh Kristian kan nihna nen pawh a inhmeh lo," a ti a; 'Thil engkim miin in chunga an tiha in duh tur ang apiang chu, mi chungah pawh ti ve rawh u' tih Bible-in a sawi chu vawng tlat turin Mizo mipuite a sawm.

Tun hnaiah Myanmar, Manipur leh Bangladesh lama tualchhung buaina avangin Zo hnahthlak tam tak Mizoramah sahimna zawngin an rawn lut tih sawiin Chief Minister chuan, "Sorkar, kohhran leh tlawmngaipawlte, mimalte pawhin theihtawp chhuahin kan lo ṭanpui a, a va mawi tehlul em. Kan unaute lo tuamhlawm hi kan tihtur a ni," a ti.

Lalduhoma chuan Zo hnahthlak , sahimna zawnga Mizorama khawsa mekte chu India ram mai ni lo, khawvel huap pawha an chhuan ram ralmuang Mizoramah an rawn lut tih hre tura chahin, "Ralmuang taka kan awm theihna bul, khawtlang leh ram dante lo zawm ṭha ang che u. Dan bawhchhetute chu dan angin kan hrem mai ṭhin," a ti a, tumah dan hmaah ngaihhnathiamna pek bik theih a nih loh thu a sawi.