Hmun kilkhawra tihdam hna thawktute an hnathawh hlutsak an phu - Larsap

Governor Dr Hari Babu Kambhampati chuan February 29, Ningani khan Aijal Club-ah Association of Surgeons of Mizoram (ASM) annual conference a hmanpui a; "Zoram hmun chengker leh kilkhawra tihdam rawngbawl hna thawktute hian mipui lam aṭanga thlawpna leh an hnathawh hlutsak an phu," a ti.

Governor Dr Hari Babu Kambhampati chuan, damlo enkawlna leh natna zirchianna kawngah surgeon-te'n an thawh hlawk hle tih a sawi a, "Surgeon-te hna chu hna pawimawh tak, mipuiten kan mamawh a nih rualin, hna khirh leh fimkhur ngai tak a ni. He hna hi tihfuh loh palh châng a thleng ve zeuh ṭhin," a ti a, sawiselna a lo awm pawhin zam mai loa tihdam rawngbawlna thawktu, hna zahawm bik thawktu an nih anga ṭha takin an hna te, uluk leh zuala an thawh a ngaih thu a sawi.

Nikum lama ZMC-a surgeon-te hlawhtlinna ropui tak sawilangin Governor chuan, "Dr John Lalliandinga kaihhruai medical team-in ZMZ-a conjoined twins hlawhtling taka an zai kha thil ropui tak a ni a, ASM chhungkuate he hlawhtlinnaah hian ka lawmpui a, ka chhuang a ni. NHM hnuaia central sorkarin kan lo hrisel zawkna tur leh hma kan lo sawn deuh deuhna turin hmalakna pawimawh tak tak a nei a, hemi tihhlawhtlin kawngah hian doctor-te inpekna leh thawhrimna chu thil pawimawh ber zinga mi a ni," a ti a, ṭan la sauh sauh turin doctor kalkhawmte a fuih.

ASM conference-ah hian an president Dr Saia Chenkual-in thuchah a sawi bakah, ASM secretary Dr Lalrinsiama'n report a pe a; Dr R Tlangkunga oration segment-ah Dr Om Tantia chuan 'Minimal Access Surgery : Lessons Learnt in a Journey of 3 Decades' tih thupui a sawifiah bawk a ni.