MP K Vena'n kawng laitute ṭawiawm turin Arakan Army-te a ngen

Rajya Sabha MP K Vanlalvena chuan February 29, Ningani khan Arakan Army-te Myanmar-a an camp-ah tlawhin, Kaladan Multi Modal Transit Transport Project (KMMTTP) kawng laitute tibuai lo turin a ngen.

K Vanlalvena chuan, Arakan Army hotute chu kawng laih mek chu zawh a nih hunah an zavaia chhawr ṭangkai tur a nih thu hrilhin, hnathawktute ṭawiawm turin a ngen nghal. Arakan Army hotute chuan kawng siamtute tan harsatna an siam dawn loh bakah, a ṭul dan a zir zelin venhimna an pek zawk tur thu Rajya Sabha MP hi an hrilh.

Zorinpui aṭanga Paletwa inkar kawngpui sial mek chu ramri aṭanga Myanmar ram chhung (km. 8 a thui) thleng K Vanlalvena hian a tlawh a, kawng laih hna thawk mektu IRCON Company Deputy Manager leh an hnuaia hna thawktu Myanmar sub- contractor-te nen an inkawm.

K Vanlalvena chuan, kawng laih hna hi beisei aia a muan thu leh a chak thei ang bera thawh a ṭul thu a sawi chungchangah contractor-te chuan, chak taka hna thawh a nih tawh tur thu an sawi bawk.