Taiwan-ah ṭawng zirturin Mizo ṭhalai kal dawn

India rama Taiwan ram palai (ambassador) Baushuan Ger chuan nimin khan Mizoram Youth Commission (MYC) office tlawhin MYC Chairman leh a thawhpuite a kawm a; Taiwan sorkar senso vekin Taiwan-ah Mandarin ṭawng zir tur Mizo ṭhalai graduate chin mi pali tirh ni se, an ti.

Taiwan Ambassador hi MYC chairman Malsawmzuala Ralte, under secretary H Lalnunzuala leh thawktu dangte'n lo dawngsawngin, Taiwan leh India sorkarin labour mobility-a inremna thuthlung an ziah hrula Mizo ṭhalaite'n Taiwan-a hna an thawh theih dan tur an sawiho a ni.

Sorkar aiawhte ṭhukhawm chuan Taiwan sorkar senso vekin Taiwan-ah Mandarin ṭawng zir tur Mizo ṭhalai graduate chin mi pali tirh ni se, an ti a; he'ng mite hi kum khat course an zir zawhah Mizoramah Mandarin ṭawng zirtirtu an ni chhunzawm nghal dawn a ni.

He hunah hian Mandarin ṭawng zirtirna hmun tur atana MYC office-a class room remchang turte enho nghal a ni a; Taiwan Ambassador chuan Mizo ṭhalai Mandarin ṭawng zirtir thei an awm hmaa online-a zirna ruahman tura hma a lak tur thu a sawi bawk.