Poll committee thlan chungchangah JNU zirlai pawlte intibuai

Jawaharlal Nehru University (JNU), Delhi-a Rashtriya Swayamsevak Sangh (RSS) hnuaia zirlai pawl, Akhil Bharatiya Vidyarthi Parishad (ABVP) leh Left party thlawp, All India Students' Association (AISA) chu poll committee thlan chungchangah an intibuai a, zirlai ṭhenkhatin hliam an tuar a, damdawi-inah dah luh ngaite an awm.

Ningani zan khan zirlai pawl pahnihte hi School of Languages building-ah an intibuai a, buaina chhuah chhanah mawhphurtuah inpuh tawnin, police-ah pawh complaint an thehlut ve ve a ni. University vice-chancellor Santishree D Pandit chuan university thuneitute chuan he thil thleng hi an chhui chiang dawn a, buaina chhuak chungchanga mawhphurtute chungah action na taka lak a nih tur thu a sawi.

JNU student union, JNUSU chuan zirlai pawl hruaitu inthlan neih tur chungchangah genreal body meeting a ko a, hetah hian election committee member thlan chungchangah zirlai pawl pahnihte inhnialbuaiin, meeting pawh hi an tibuai zui a ni. Left group lam chuan election committee thlan danah lungawi loin, ABVP member-te hian JNUSU officer bearers leh zirlai dangte chu an bei niin an sawi a, JNUSU joint secretary Mohammad Danish chuan JNUSU president Aishe Ghosh nen ABVP member-te hian an vau a,amah phei chu meeting lai hian an hreng niin a sawi bawk.