HPC(D)-te'n inbiak an duh - Home Minister

Home minister R Lalzirliana chuan, Hmar People Convention-Democrat (HPC-D) ten inbiak an duh niin a sawi a, "Police-te silai an man tawh sa an rawn kîr a nih chuan sorkarin inbiakna a ngaihtuah ang," a ti.

R Lalzirliana hi nimin khan Congress Bhavan-ah thu sawiin, "Hmar area-a V/C inthlanna turah HPC(D)-te’n harsatna an siamin kan inthlang thei lo a. Nimahsela, HPC(D)-te hian sorkar nen inbiak an duh thu kan hria a a ni," a ti.

Silai tunga Hmar area chhunga hel dang a awm tawh miah lohna tura hma an lak theih a, police-te silai an man tawh sa sorkara an hlan thei a nih chuan sorkarin inbiakna a ngaihtuah tur thu Home Minister chuan a sawi.

Home Minister chuan, sum leh pai harsa chung chungin ram leh hnam tana mamawh Mizoram sorkarin a tihhlawhtlin zel thu sawiin, "Kan hotute ṭan laknate a rah ṭha a lang chho zel a ni. Harsa chung chung pawhin ram leh hnam tana mamawh chu tihhlawhtlin zel a ni," a ti a; India rama state-te zinga hmasawnna kawnga tiṭha ber lawmman Mizoramin a dawng chu thil lawmawm tak a nih thu a sawi.

MPCC Vice President chuan, lal duh ringawt, hnathawh peih lote chu ram tan an ṭhat loh thu sawiin, thuneihna an chan laia ei ringawt duhte thusawite chu ngai pawimawh lo turin an party mite a chah a ni.

Mi sawiselna lam chauh ngaihtuah a ṭhat lo thu sawiin R Lalzirliana chuan, "Min sêlna ringawt ngaihtuah loin, khawng takin kan tum ram pana kal ngar ngar a pawimawh," a ti a; an manifesto-te chu a theih ang anga an tihpuitlin chhoh zel thu a sawi.