Hlakungpui Mualah mi 3 seng lut

Mizo Hlakungpui Mual, Khawbunga seng luh thar hla phuah thiam Lalsangzuali Sailo leh thu ziak mi pahnih R Vanlawma leh James Dokhuma te chawimawina lung chu nimin khan bialtu MLA T Sangkunga'n a hawng.

Thu leh hla lama mi chhuanawm pathumte Hlakungpui Mual telh leh anmahni chawimawina lung hawn inkhawm hi Mizo Hlakungpui Mual Committee chairman PC Lalluia'n a kaihruai a; Champhai Kahrawt bialtu pastor Rev. C Lal-ngaihthanga'n hunserh hmangin, Committee secretary Samuel Mal-sawm-tluanga'n Hlakung-pui thawh 5-na atana inbuatsaihna leh hma-lakna chanchin a sawi.

T Sangkunga chuan, Hlakungpui Muala seng luh thar mi pathumte chu mi chhuanawm tak tak an nih thu leh Mizote'n an hriat reng tawh turte an nih thu a sawi a; Mizo Hlakungpui Mual chu Zofate suihkhawm zeltu a nih a beisei thu a sawi bawk.

T Sangkunga hian Mizo Hlakungpui Mual thawh 5-na inbuatsaih nan Rs. 2,00,000 a pe a, nimin khan zaithiamte lawmman atan Rs. 50,000 a pek leh bakah, Khawbung Higher Secondary School inenkawl nan Rs. 1,00,000 a pek tur thu a sawi a ni.

Inkhawmah hian Hla-kungpui Muala seng luh tak mi pathum chhungte'n thu an sawi a; tlaiah a lawmna ruai an ṭheh.

Nimina mi pathum seng luh tâkte nen han Mizo Hlakungpui Mualah hian hla phuah thiam 21 leh thu ziak mi 15, an vaiin mi 36 seng luh tawh an ni.