Traffic police khauh an tum

Traffic SP chuan thuchhuah siamin, theihtawp chhuaha fimkhur tura inzirtirna an kalpui chung pawha traffic dan bawhchhia man ngai an awm reng chu pawi an tih thu a tarlang a; dan bawhchhiate lakah khauh lehzual an tum thu a puang.

Traffic SP thuchhuah tarlan danin, lirthei chetsualna tam ber chu lirthei tlân chak lutuk leh traffic signal zâwm loa tlân luite an nih thu te, bungraw phur chi lirtheiah phurh zawh tâwk aia rit phurh vang te, bungrua phur chi lirtheia mihring (passenger) phurh vang te, zu leh damdawi rûi chunga lirthei khalh vangte leh mobile phone hmang chunga lirthei khalh vangte a ni a; hengah hian khauh lehzual an tum a ni.

Lirthei chetsualna leh traffic dan bawhchhia vênna atan traffic dan bawh-chhiate chungah khauh leh zuala hma la turin tun hnaiah Supreme Court Committee on Road Safety pawhin thuchhuah a siam niin a tarlang.

Traffic SP chuan, a theih chin chinah April 18 aṭangin khauh leh zuala hmalak an tum thu sawiin, lirthei khalhtute leh neitute fimkhur turin a ngen lâwk a ni.

Traffic SP tarlan danin, kum 2015-ah lirthei dan bawhchhia mi 17,726 man an ni a, an pawisa chawi tlingkhawm chu Rs. 2,730,800 a ni.