KHAWTHLIR

Thisen pe

Haulawng branch YMA chuan an khaw kum 100 tlin lawm nan nimin khan an khuaah blood donation camp an huaihawt a, mipa 93 leh hmeichhia 14-in Lunglei Civil Hospital tan thisen unit 107 an pe. Nimin vek khan Mt. Carmel School zirlai mipa paruk leh hmeichhia pangate'n Aizawl Civil Hospital-ah thisen unit 11 an pe bawk.

Heroin man zat

Central YMA hnuaia SRS-te chuan, March 16-31, 2016 chhung khan heroin hawng 8.5, can 96 leh chhîn sen 3 an man a, chu'ngte chu Aizawla an hralhna rate-in Rs. 6,44,700 hû a ni. He mi chhung vek hian ruihhlo kaihhnawiha an man zinga mi pahnih chu police-ah hlanin, mi 11 home-ah an dah a, mi 53 chu Pathian thu hmangin counselling neihpui an ni.

Office sawn

Bangalore-a Mizoram House-a deputy resident commissioner pisa chu No. 79, 38 Main, 2nd Cross, BOOH BCS Layout, BTM II Stage, Madiwala-ah sawn a ni. Telephone no. 080-2668 4823 (O) leh mobile phone no. 7760600383-ah biak theih a ni.

PIP thlirho

Health department chuan nimin khan Aijal Club-ah Mizoram State Health Society Executive Committee-in CMO-te tana kum 2016-17 chhunga Programme Implementation Plan (PIP) an siamte an thlirho.

Museum tlawh

Union minister of state for Rural Development Sudarshan Bhagat chuan, nimin khan Mizoram State Museum a tlawh. Sudarshan Bhagat chuan museum-a thil hlui vawn ṭhatte chuan chiang takin Mizo history an tarlan thu visitor note book-ah a ziak lang a ni.

USA-ah thi

Darrikhuma(92) Washington DC, USA chu April 4, 2016 khan pneumonia leh stroke natna avangin Washington DC damdawi-inah a boral. Kum 1964 aṭangin USA-ah awm tawhin Mizo zinga USA-a pem hmasa ber zinga mi a ni a; a puala thlan ṭhutna hi a nau H Hrangliana in, Zemabawk Beraw Tlang peng bulah April 10 (Pathianni) tlai dar 2:00-ah neih a ni ang.

CM Rangoon-ah

Myanmar-a châm mek, chief minister Lal Thanhawla chuan nimin khan Tahan aṭangin Rangoon a pan a, tlai lamah rangoon a thleng a, Rangoon-a Mizo hruaitute'n an lo hmuak. CM Lal Thanhawla hi nizan khan Rangoon-a Mizote nen an inkâwm a; Rangoon-ah hian Pathianni thleng an chám ang. Chief minister hian Tahan-a Mizote'n Chapchar Kut an hman chu tun hnai khan a hmanpui a, Mizo awmna hmun
ṭhenkhatte a tlawh a ni.