Pa ei vangin mi 3 thi, mi 4 enkawl mek
March 4, 2016 tlaia pâ (mush-room) ei vanga damlote zinga mi pathum chu an thi a, nimin khan an vui. Pa eitu dang palite Aizawl Civil Hospital-ah enkawl mek an ni.
Thu dawn danin, Mamit Bazar Venga Saikhuma (35)-te chhungkua chuan April 4, Thawhṭanni tlai khan papàr nia hriat chu chawhmeh atan hmangin an ei a; chaw an ei kham hnu deuhah an vaiin an pum an sawisel a, khawṭhaloin an zût bakah, an luak avangin April 5 khan Mamit District Hospital-ah dah luh an ni.
Pa eitute chu - Saikhuma bakah a nupui Ramdinmawii (34), an fate - Saihmingthanga (12), Biakrinawma (10), Malsawmtluanga (8) leh Miriam Lalremruati (3)-te bakah, an mikhual VL Hriata (20) s/o Liankhama, Tuikual, Aizawlte an ni.
An fa ú ber dawttu, Biakrinawma chu Ningani zan dar 8:10 khan Ma-mit Hospital-ah a thi a, a chhang chiah Malsawmtluanga pawh nimin zing dar 7:45 khan Mamit damdawi-inah bawk a thi leh a ni.
Saikhuma chu a nat zual avangin nimin zing dar 4 vel khan Aizawl Civil Hospital panpui nih hnuah, zing dar 9 velah a thi ve leh bawk.
Mi dang palite pawh Mamit DC leh Officers Club-te'n nimin khan Aizawla phurh thlen dan tur ngaihtuahin, nimin chawhnu dar 1:15 khan Aizawl Civil Hospital thlenpui an ni a; an fa ú ber Saihmingthanga chu ICU-ah dah nghal niin, mi dang pathum - Ramdinmawii, an fa naupang ber Miriam Lalruatfeli leh an mikhual VL Hriata te chu Casualty ward-ah enkawl mek an ni thung.
Damlote enkawltu doctor chuan Vanglaini palai zawhna chhángin, Casualty ward-a enkawl mekte chu an harh ṭhat rih thu a sawi a; ICU-a enkawl Saihmingthanga pawh a
ṭhat chhuah leh theih an beisei thu a sawi bawk.
Saikhuma ruang hi Aizawl
aṭangin bialtu MLA, minister John Rotluangliana leh Mamit DC Lalbiaksangi ten thlah liamin, nimin chhun dar 12 vel khan Mamit thlenpui a ni a; a fate pahnih nen nimin tlai khan vui an ni.
Saikhuma te chhungkuain pâ laknaah nimin khan Mamita tlangval ṭhenkhatte kalin, an lak bâng papàr (wild mushroom) nia hriatte an la a, Horticulture mithiamte enfiah turin Hocticulture directorate-ah thawn a ni.